# پاکستان ایئر فورس کا یوم شہداء پر شہدا کو خراج عقیدت
راولپنڈی: پاکستان ایئر فورس (PAF) نے ملک بھر کے تمام فضائی اڈوں پر 7 ستمبر کو یوم شہداء کے طور پر منایا، تاکہ اپنے شہداء کی عظیم قربانیوں کو خراج تحسین پیش کیا جا سکے اور ان کی شجاعت، بہادری اور فرض شناسی کو سلام کیا جا سکے۔
تقریبات کا آغاز خصوصی دعاؤں سے
یہ دن خصوصی دعاؤں اور قرآن خوانی کے ساتھ شروع ہوا، جو 1965 اور 1971 کی جنگوں کے شہداء، مارکہ حق کے بہادر شہداء اور پاکستان کے قیام کے بعد سے فرض کی راہ میں قربان ہونے والے تمام پاک فضائیہ کے اہلکاروں کے لیے منعقد کی گئیں۔
ایئر ہیڈکوارٹرز میں مرکزی تقریب
اسلام آباد میں ایئر ہیڈکوارٹرز میں منعقدہ یوم شہداء کی تقریب میں چیف آف دی ایئر اسٹاف ایئر چیف مارشل ظہیر احمد بابر سدھو نے بطور مہمان خصوصی شرکت کی۔
ایئر چیف نے پاک فضائیہ کے شہداء کو جرات و استقامت کا نشان قرار دیتے ہوئے خراج عقیدت پیش کیا اور کہا کہ ان کی قربانیاں پاک فضائیہ کی بہادری، پیشہ ورانہ مہارت اور وطن کے دفاع کے لیے غیر متزلزل عزم کی پائیدار روایت کی بنیاد ہیں۔
شہداء کی قربانیاں زندہ ورثہ ہیں
انہوں نے کہا کہ ہمارے بزرگوں کی بہادری کے کارنامے محض تاریخ کے صفحات نہیں بلکہ ایک زندہ ورثہ ہیں جو موجودہ نسل پر گہری ذمہ داری عائد کرتے ہیں۔ شہداء کو خراج تحسین پیش کرتے ہوئے چیف آف دی ایئر اسٹاف کا کہنا تھا کہ ہمارے شہداء جرات، قربانی اور قومی عزم کی پائیدار علامت ہیں۔ ان کی یاد ہمیں بتاتی ہے کہ وطن کا دفاع ایک مقدس ذمہ داری ہے جسے ہم پوری ثابت قدمی کے ساتھ نبھاتے رہیں گے۔
یادگار شہداء پر پھولوں کی چادر
تقریب کے اختتام پر ایئر چیف نے یادگار شہداء پر پھولوں کی چادر چڑھائی اور پاک فضائیہ کے بہادر شہداء کی یاد میں فاتحہ خوانی کی۔
