جکارتہ: پاکستان نے بدھ کے روز انڈونیشیا کو 0-2 سے شکست دے کر 2026 ایشین فٹبال کنفیڈریشن (اے ایف سی) ویمنز ایشین کپ کے کوالیفائرز کے دوسرے گروپ میچ میں شاندار کامیابی حاصل کی۔ یہ فتح اس وقت آئی جب پاکستان نے اپنے پہلے گروپ میچ میں چائنیز تائپے کے خلاف 8-0 کی شکست کا سامنا کیا تھا۔
پاکستان کی قومی ٹیم گروپ ‘ڈی’ میں چائنیز تائپے، انڈونیشیا اور کرغزستان کے ساتھ شامل تھی۔ پاکستانی فٹبال فیڈریشن (پی ایف ایف) نے اس فتح کو خواتین فٹبال کے میدان میں ایک سنگ میل قرار دیا ہے۔ پی ایف ایف نے اپنے ایک پوسٹ میں کہا، “پاکستان نے 95 ویں نمبر کی انڈونیشیا کو 0-2 سے شکست دی۔ طاقت، جوش اور مقصد کا بھرپور مظاہرہ۔”
میچ کے آغاز میں ہی آٹھویں منٹ میں نادیہ خان نے پاکستان کے لیے پہلا گول کیا جبکہ انیسویں منٹ میں سوہا ہیرانی نے پنالٹی کے ذریعے برتری کو دوگنا کردیا۔
انڈونیشیا کی ٹیم نے میچ میں واپسی کی بھرپور کوشش کی لیکن کوچ ساتورو موچیزوکی کے کھلاڑی اس فرق کو ختم کرنے میں ناکام رہے۔
پاکستان اب اپنے گروپ کے آخری میچ میں 5 جولائی کو کرغزستان کا سامنا کرے گا۔ پاکستان کی ٹیم میں گول کیپرز جیناہ فاروقی، نشا اشرف اور زینا جیوراج شامل ہیں جبکہ دفاع میں علیہ صادق، لیلا بنارس، کپتان ماریا خان، نزیلہ صدیقی اور صوفیہ قریشی شامل ہیں۔ مڈفیلڈ میں امینہ حنیف، اذوا چودھری، مرشا ملک، رمین فرید، سنا مہدی اور سوہا ہیرانی جب کہ فارورڈز میں انمول ہیرا، اقصیٰ مشتاق، اسرا خان، مریم محمود، نادیہ خان، زہینہ ملک اور زلفیہ نذیر شامل ہیں۔
پاکستان کی اس فتح کو خواتین فٹبال کی ترقی کے لیے ایک اہم قدم قرار دیا جا رہا ہے جس سے مستقبل میں قومی سطح پر اس کھیل کو مزید فروغ ملنے کی امید ہے۔
