بالی وڈ کے نامور ہدایت کار کرن جوہر نے سیف علی خان اور امریتا سنگھ کے بیٹے ابراہیم علی خان کے فلمی ڈیبیو کی سرکاری طور پر تصدیق کردی۔ ابراہیم کے فلمی دنیا میں قدم رکھنے کے حوالے سے کافی عرصے سے قیاس آرائیاں جاری تھیں، جن کا اختتام کرن جوہر کی جانب سے ایک طویل سوشل میڈیا پوسٹ کے ذریعے ہوا۔
کرن جوہر نے اپنی پوسٹ میں ابراہیم کے ٹیلنٹ کو سراہتے ہوئے کہا کہ فلمیں ان کے خون میں ہیں اور یہ ان کی جینز کا حصہ ہیں۔ انہوں نے مزید کہا کہ ابراہیم کا جوش اور لگن قابل تعریف ہے۔ تاہم، کرن جوہر نے فلم کے بارے میں کوئی خاص تفصیلات شیئر نہیں کیں۔
اس پوسٹ کے بعد بالی وڈ کے کئی معروف ستاروں نے ابراہیم کو مبارکباد دینا شروع کردی ہے۔ سیف علی خان کے مداح بھی بیٹے کی فلمی دنیا میں آمد پر خوشی کا اظہار کررہے ہیں۔ کرن جوہر نے اپنی پوسٹ میں امریتا سنگھ اور سیف علی خان سے اپنے تعلقات کا بھی ذکر کیا، جو ان کی فلمی کیریئر کے ابتدائی دور سے جڑے ہوئے ہیں۔
ابراہیم علی خان کے فلمی ڈیبیو کی تفصیلات ابھی تک سامنے نہیں آئی ہیں، لیکن یہ واضح ہے کہ وہ اپنے والدین کی طرح فلمی دنیا میں اپنا نام روشن کرنے کے لیے تیار ہیں۔ کرن جوہر کی جانب سے ابراہیم کو لانچ کرنے کا فیصلہ بھی بالی وڈ میں اقربا پروری کے الزامات کو مزید ہوا دے رہا ہے، لیکن اس کے باوجود ابراہیم کے مداحوں کو ان کے پرفارمنس کا بے صبری سے انتظار ہے۔
بالی وڈ میں نئی نسل کے اداکاروں کی آمد کا سلسلہ جاری ہے، اور ابراہیم علی خان بھی اس فہرست میں شامل ہوچکے ہیں۔ اب دیکھنا یہ ہے کہ وہ اپنے پہلے پروجیکٹ کے ذریعے کس طرح اپنی صلاحیتوں کا لوہا منواتے ہیں۔
