کوکا کولا نے فرانس اور یورپ کے کئی ممالک میں مشروبات کی بڑی تعداد واپس بلانے کا فیصلہ کیا ہے، جس کی وجہ ان میں کلوریٹ کی مقدار کا حد سے زیادہ ہونا بتائی گئی ہے۔ اس واپسی میں کوکا کولا، سپرائٹ، فانٹا، فیوز ٹی، منٹ میڈ، نالو، رائل بلس اور ٹراپیکو کے کین اور شیشے کی بوتلیں شامل ہیں۔ یہ مشروبات نومبر سے بیلجیم، نیدرلینڈز، برطانیہ، جرمنی، فرانس اور لکسمبرگ میں فروخت کے لیے پیش کیے گئے تھے۔
کوکا کولا یوروپی پیسیفک پارٹنرز بیلجیم کے مطابق، اس واپسی کا تعلق ان مصنوعات سے ہے جن پر 328 GE سے 338 GE تک کے پروڈکشن کوڈ درج ہیں۔ صارفین ان مصنوعات کو فروخت کے مقام پر واپس کر کے رقم کی واپسی کا مطالبہ کر سکتے ہیں۔ بیلجیم کی فوڈ سیفٹی ایجنسی نے اس حوالے سے تفصیلات جاری کی ہیں۔
یورپی فوڈ سیفٹی اتھارٹی کے مطابق، کلوریٹ کی زیادہ مقدار صحت کے لیے خطرناک ہو سکتی ہے، خاص طور پر بچوں کے لیے جو آئیوڈین کی کمی کا شکار ہوں۔ طویل عرصے تک کلوریٹ کے استعمال سے صحت پر منفی اثرات مرتب ہو سکتے ہیں۔
کوکا کولا کے ترجمان نے بتایا کہ اس واپسی میں شامل مصنوعات کی تعداد کا صحیح اندازہ تو نہیں لگایا جا سکا، لیکن یہ واضح ہے کہ یہ ایک بڑی مقدار ہے۔ کمپنی نے صارفین سے اپیل کی ہے کہ وہ مذکورہ پروڈکشن کوڈ والی مصنوعات کو استعمال نہ کریں اور انہیں واپس کر دیں۔
یہ اقدام یورپ بھر میں صارفین کی صحت و سلامتی کو یقینی بنانے کے لیے اٹھایا گیا ہے۔ کمپنی نے اس معاملے پر مزید تفصیلات جاری کرنے کا وعدہ کیا ہے۔
