امریکا (اصل میڈیا ڈیسک) امریکی صدر جو بائیڈن اور شاہ سلمان بن عبدالعزیز کی گفتگو ایسے وقت ہوئی ہے، جب ایرانی حمایت یافتہ حوثیوں نے سعودی عرب پر ڈرون اور میزائل حملے تیز کر دیے ہیں اور اس کے اہم حلیف ‘یو اے ای‘ کو بھی نشانہ بنایا ہے۔
سعودی عرب کے سرکاری خبر رساں ادارے ایس پی اے کے مطابق امریکی صدر جو بائیڈن اور سعودی عرب کے شاہ سلمان بن عبدالعزیز کے درمیان بدھ کے روز ٹیلی فون پر بات چیت ہوئی۔ دونوں رہنماؤں نے مملکت سعودیہ میں شہری اہداف پر ایرانی حمایت یافتہ حوثیوں کے حملوں سمیت علاقائی صورت حال پر تبادلہ خیال کیا۔دونوں رہنماؤں نے باہمی تعاون کو مضبوط بنانے اور خطے میں استحکام کے لیے اقدامات کی ضرورت پر بھی زور دیا۔
وائٹ ہاؤس کی طرف سے جاری ایک بیان میں کہا گیا ہے،”صدر نے ہونے والے حملوں سے سعودی عرب اور علاقے کے عوام کے تحفظ کے حوالے سے امریکا کے عہد کا ذکر بھی کیا اور یمن میں جاری جنگ کو ختم کرنے کے لیے اقوام متحدہ کی قیادت میں کی جانے والی کوششوں کی مکمل حمایت کی۔‘‘
وائٹ ہاؤس کے بیان میں مزید کہا گیا ہے کہ جو بائیڈن نے یمن کے حوثی باغیوں کی طرف سے حملوں کے خلاف سعودی عرب کی مکمل حمایت کا اعادہ بھی کیا۔
سعودی خبر رساں ایجنسی ایس پی اے کے مطابق شاہ سلمان بن عبدالعزیز نے امریکی صدر سے کہا،”سعودی عرب ایران کو جوہری طاقت بننے سے روکنے کے لیے امریکا کی کوششوں کے ساتھ ہے اور خطے میں ایران نواز عناصر کی ‘تخریبی سرگرمیوں‘ سے نمٹنے کے لیے مشترکہ جدوجہد ضروری ہے۔‘‘
شاہ سلمان نے مزید کہا کہ سعودی عرب خطے میں کشیدگی پیدا کرنے والے تمام اسباب کے ازالے کو ختم کرنے اور حالات کو معمول پر لانے کے لیے بات چیت جاری رکھنے کا خواہاں ہے۔ ان کا کہنا تھا،”سعودی عرب یمن میں جامع سیاسی حل کا خواہاں اور یمنی عوام کے امن وسلامتی اور ترقی کے لیے کوشاں ہے۔‘‘
سعودی فرمانروا نے ”امن کے قیام دہشت گردی کے خلاف‘‘ سعودی عرب کی کوششوں کی حمایت کے لیے امریکی صدر جو بائیڈن کا شکریہ ادا کیا۔
سعودی عرب کی قیادت والے امریکی اتحاد نے یمن میں سن 2015 میں حوثی باغیوں کے خلاف فوجی کارروائی کا سلسلہ شروع کیا تھا تاکہ سعودی حمایت یافتہ صدر منصور ہادی کی حکومت کو بحال کیا جا سکے۔حوثی باغیوں نے اس وقت دارالحکومت صنعا سمیت ملک کے بیشتر حصوں پر قبضہ کر لیا تھا۔
اس فوجی کارروائی اور جنگ کے نتیجے میں یمن مختلف مسائل بشمول قحط سالی سے دوچار ہو گیا۔ اقوام متحدہ نے اسے دنیا کا بدترین انسانی بحران قرار دیا ہے۔
سعودی قیادت والے امریکی اتحادکا الزام ہے کہ حوثی باغیوں کو ایران کی حمایت حاصل ہے تاہم حوثی اور تہران دونوں ہی اس الزام کی تردید کرتے ہیں۔
حوثیوں نے حالیہ دنوں سعودی عرب کے خلاف اپنے حملے تیز کر دیے ہیں جبکہ 17 جنوری کو اس نے ابوظہبی پر بھی ڈرون حملہ کیا تھا، جس میں تین افراد مارے گئے تھے۔
