سیالکوٹ: وزیراعلیٰ پنجاب مریم نواز شریف نے کہا ہے کہ پانچ سال سے چور چور کا راگ الاپنے والے کوئی ثبوت پیش نہیں کر سکے۔ انہوں نے زور دے کر کہا کہ جلاؤ گھیراؤ اور تشدد ہماری سیاست کا حصہ نہیں، اور ان کا احتساب عوام کے ہاتھ میں ہے۔
سیالکوٹ میں گورنمنٹ کالج ویمن یونیورسٹی میں ہونہار سکالر شپ پروگرام کے تحت چیکس تقسیم کرنے کی تقریب سے خطاب کرتے ہوئے مریم نواز نے کہا کہ ہونہار سکالر شپ پروگرام پاکستان کی تاریخ کا سب سے بڑا تعلیمی پروگرام ہے۔ انہوں نے سکالر شپ حاصل کرنے والے طلبہ کو مبارکباد پیش کی اور کہا کہ یہ سکالر شپس میرٹ کی بنیاد پر دی جا رہی ہیں، اور کسی قسم کی سفارش کو قبول نہیں کیا گیا۔
انہوں نے بتایا کہ گزشتہ 11 ماہ کے دوران کسی بھی محکمے میں سفارش پر کوئی تعیناتی نہیں کی گئی۔ مریم نواز نے مزید کہا کہ سکالر شپ پروگرام کو جلد ہی سیکنڈ ایئر اور تھرڈ ایئر کے طلبہ کے لیے بھی شروع کیا جائے گا۔ انہوں نے کہا کہ وزیراعلیٰ ہونے کے ناطے ان کی ذمہ داری ہے کہ وہ صوبے کے ہر طالب علم کا خیال رکھیں اور کوئی بچہ تعلیم سے محروم نہ رہے۔
مریم نواز نے تعلیم کے معیار کو قوم کی ترقی کے لیے بنیادی قرار دیتے ہوئے کہا کہ ہونہار طلبہ نے اپنی محنت اور اہلیت سے یہ سکالر شپس حاصل کی ہیں۔ انہوں نے طلبہ کو مخاطب کرتے ہوئے کہا کہ آپ جیسے ہونہار طلبہ ہی پاکستان کا مستقبل ہیں۔
وزیراعلیٰ پنجاب نے نوجوانوں کو اپنی پہلی ترجیح قرار دیتے ہوئے کہا کہ ان کے لیے راستے نکالنا ان کی ذمہ داری ہے۔ انہوں نے بتایا کہ لیپ ٹاپ کی پہلی کھیپ پہنچ چکی ہے اور جلد ہی طلبہ میں لیپ ٹاپ تقسیم کا عمل شروع کیا جائے گا۔ انہوں نے یہ بھی وعدہ کیا کہ طلبہ کو مفت ایک لاکھ الیکٹرک بائیکس بھی فراہم کی جائیں گی۔
مریم نواز نے کہا کہ سیاست خدمت کا نام ہے اور انہوں نے کبھی تشدد کی سیاست نہیں کی۔ انہوں نے کہا کہ وہ لشکر کشی کے بجائے خدمت کی سیاست پر توجہ مرکوز رکھے ہوئے ہیں۔ انہوں نے خیبرپختونخوا حکومت پر پنجاب پر حملے کا الزام بھی عائد کیا۔
انہوں نے مزید کہا کہ جو نوجوانوں کے ٹھیکیدار بنے ہوئے تھے، انہوں نے کیا کام کیا؟ انہوں نے کبھی نہیں کہا کہ میری خاطر سڑکوں پر توڑ پھوڑ کرو یا رینجرز اور پولیس کی وردیاں پھاڑ دو۔
مریم نواز نے معیشت میں بہتری کی طرف اشارہ کرتے ہوئے کہا کہ ڈوبتی معیشت کو بہتری کی طرف لایا گیا ہے، ترسیلات زر میں اضافہ ہوا ہے، اور سٹاک مارکیٹ تاریخ کی بلندیوں پر پہنچ گئی ہے۔ انہوں نے کہا کہ مہنگائی میں نمایاں کمی آئی ہے۔
تقریب کے دوران وزیراعلیٰ پنجاب نے دو طالبات کو سٹیج پر بلایا، جنہوں نے مریم نواز کو پینٹنگز بطور تحفہ پیش کیں۔ مریم نواز نے کہا کہ وہ ان تحائف اور تصاویر کو اپنے دفتر میں لگائیں گی۔ انہوں نے طالبات کو اپنی کرسی پر بھی بٹھایا۔
اس موقع پر وزیر دفاع خواجہ آصف بھی موجود تھے۔ تقریب کے دوران مریم نواز نے ہونہار سکالر شپ پروگرام کے تحت چیکس بھی تقسیم کیے۔
