بیجنگ: چین نے اعلان کیا ہے کہ ایک پاکستانی خلا باز چین کے شینژو-24 مشن کے عملے میں بطور پے لوڈ اسپیشلسٹ شامل ہوگا، جو چین کے انسانی خلائی پروگرام کی تاریخ میں چینی اور غیر ملکی خلا بازوں کا پہلا مشترکہ مشن ہوگا۔
چینی وزارت خارجہ کے ترجمان گوئو جیا کن نے بیجنگ میں باقاعدہ پریس بریفنگ کے دوران کہا کہ چین پاکستان کے ساتھ مل کر اپنی روایتی دوستی کو آگے بڑھانے، خلا سمیت دیگر شعبوں میں تعاون کو گہرا کرنے اور دوطرفہ تعلقات کو نئی بلندیوں تک لے جانے کے لیے تیار ہے۔
پاکستانی خلا باز کا مختصر مداری سفر
بریفنگ میں بتایا گیا کہ پاکستانی خلا باز شینژو-24 مشن کے عملے کے ساتھ بطور پے لوڈ اسپیشلسٹ شامل ہوں گے اور مختصر مداری پرواز مکمل کرنے کے بعد شینژو-23 خلائی جہاز کے ذریعے زمین پر واپس آئیں گے۔
ترجمان نے کہا کہ وسیع کائنات کی کھوج اور بیرونی خلا کا پرامن استعمال تمام انسانیت کی مشترکہ کوشش ہے اور یہ تمام اقوام کی بھلائی سے منسلک ہے۔ انہوں نے مزید کہا کہ چین بیرونی خلا کے پرامن استعمال کی حمایت کرتا ہے، فعال بین الاقوامی خلائی تعاون میں حصہ لیتا ہے اور خلا کی دنیا میں مشترکہ مستقبل کی کمیونٹی کی تعمیر کو فروغ دیتا ہے۔
دو طرفہ تعلقات کا اہم سنگ میل
گوئو جیا کن نے کہا کہ چین اور پاکستان ہمہ موسمی اسٹریٹجک تعاون پر مبنی شراکت دار ہیں اور چین کے خلائی جہاز میں پاکستانی خلا باز کی موجودگی چین کے انسانی خلائی پروگرام کی تاریخ میں چینی اور غیر ملکی خلا بازوں کا پہلا مشترکہ مشن ہوگی۔
انہوں نے کہا کہ یہ چین اور پاکستان کے سفارتی تعلقات کی 75ویں سالگرہ کے موقع پر دوطرفہ تعاون کا ایک اور اہم نتیجہ ہے۔
- پاکستانی خلا باز شینژو-24 مشن میں بطور پے لوڈ اسپیشلسٹ شامل ہوں گے
- مختصر مداری پرواز کے بعد شینژو-23 کے ذریعے زمین پر واپسی ہوگی
- یہ چین کے انسانی خلائی پروگرام میں پہلا مشترکہ چینی-غیر ملکی مشن ہوگا
- یہ دونوں ممالک کے سفارتی تعلقات کی 75ویں سالگرہ کا موقع ہے
خلا بازوں کے نام ابھی ظاہر نہیں کیے گئے
چینی خلائی مشن کا حصہ بننے والے پاکستانی خلا باز کا نام ابھی تک ظاہر نہیں کیا گیا، تاہم محمد ذیشان علی اور خرم داؤد کو چین میں تربیت کے لیے منتخب کیا گیا تھا۔
واضح رہے کہ چین نے حالیہ برسوں میں اپنے خلائی پروگرام میں بھاری سرمایہ کاری کی ہے اور وہ اپنے بڑے حریف امریکہ کا مقابلہ کرتے ہوئے 2030 تک خلا بازوں کو چاند پر اتارنے کا ہدف رکھتا ہے۔
پاکستان اس سفر میں چین کا قدرتی شراکت دار ہے، کیونکہ دونوں ممالک اکثر اپنی دہائیوں پر محیط ہمہ موسمی دوستی کا تذکرہ کرتے ہیں۔ چین پاکستان کا سب سے بڑا تجارتی شراکت دار اور ایک اہم غیر ملکی سرمایہ کار بھی ہے۔
