مستونگ: بلوچستان کے ضلع مستونگ میں سیکیورٹی فورسز نے این-25 نیشنل ہائی وے پر کندوا سیکیورٹی چوکی پر دہشت گردوں کے بارود سے بھری گاڑی کے ذریعے حملے کی کوشش بروقت کارروائی کرتے ہوئے ناکام بنا دی۔ سیکیورٹی فورسز کی جوابی کارروائی میں تین دہشت گرد ہلاک ہو گئے، جبکہ دھماکے میں دو شہری جان سے ہاتھ دھو بیٹھے اور متعدد افراد زخمی ہو گئے۔
حملے کی تفصیلات
ابتدائی معلومات کے مطابق فتنہ الخوارج سے تعلق رکھنے والے دہشت گردوں نے بارود سے بھری گاڑی کے ذریعے سیکیورٹی چوکی کو نشانہ بنانے کی کوشش کی۔ دھماکے کے نتیجے میں قریبی مکانات اور ایک مسجد کو بھی نقصان پہنچا۔
شہری ہلاکتیں اور زخمی
جاں بحق ہونے والے شہریوں کی شناخت کلیم اللہ ولد عبداللہ اور بی بی لائبہ ولد دل مراد کے نام سے کی گئی ہے۔ زخمیوں میں فرنٹیئر کور کے تین اہلکار بھی شامل ہیں۔
زخمی شہریوں کی فہرست
- 63 سالہ عبدالحق
- 21 سالہ محمد اکرم
- 35 سالہ محمد رمضان
- تین سالہ محمد سنان
- 21 سالہ تانیہ
- 23 سالہ منزہ
- 25 سالہ بی بی حسینہ
- 45 سالہ زاہدہ
- 18 سالہ فائزہ گل
- 35 سالہ شاہینہ
- 12 سالہ شاہ لیزا
- 22 سالہ معراج
- 36 سالہ بی بی سعیدہ
سیکیورٹی فورسز نے موقع پر پہنچ کر علاقے کو گھیرے میں لے لیا اور زخمیوں کو طبی امداد کے لیے قریبی ہسپتال منتقل کیا۔ واقعے کی مزید تحقیقات جاری ہیں۔
