لاہور: ملک کے مختلف شہروں میں بارش اور ہلکی بارش نے سردی کی شدت میں اضافہ کر دیا ہے، جبکہ لاہور میں بارش کے بعد فضائی آلودگی میں بھی کچھ کمی آئی ہے اور شہر کا اوسط ایئر کوالٹی انڈیکس (AQI) 111 تک کم ہو گیا ہے۔
لاہور میں موسم کی صورتحال
محکمہ موسمیات کے مطابق گزشتہ شام سے چلنے والی ہواؤں اور مختلف علاقوں میں ہلکی بارش نے فضائی معیار میں قدرے بہتری میں کردار ادا کیا ہے۔
صوبائی دارالحکومت میں آج دن بھر موسم ابر آلود رہنے کی توقع ہے، جبکہ دن کے مختلف حصوں میں الگ الگ مقامات پر ہلکی بارش کا امکان بھی موجود ہے۔
موسمیاتی اعداد و شمار کے مطابق لاہور میں زیادہ سے زیادہ درجہ حرارت 29 ڈگری سینٹی گریڈ تک پہنچنے کا امکان ہے، جبکہ کم سے کم درجہ حرارت 17 ڈگری سینٹی گریڈ رہنے کی توقع ہے۔ نمی کا تناسب 70 فیصد ریکارڈ کیا گیا ہے جبکہ ہوا کی رفتار پانچ کلومیٹر فی گھنٹہ ہے۔
بہاولپور میں فضائی آلودگی خطرناک حد تک بلند
دوسری جانب بہاولپور میں فضائی آلودگی کی صورتحال انتہائی تشویشناک ہے، جہاں ایئر کوالٹی انڈیکس 520 تک پہنچ گیا ہے۔
شمالی علاقوں میں برفباری، سڑکیں بند
خیبر پختونخوا اور گلگت بلتستان میں موسم سرما کی پہلی بارش اور برفباری نے درجہ حرارت میں زبردست کمی کر دی ہے، جس سے موسم انتہائی سرد ہو گیا ہے۔
بابوسر ٹاپ پر شدید برفباری کے باعث بیسار سے آگے سڑکیں بند ہو گئی ہیں، جس کے نتیجے میں دو آئل ٹینکرز ناموافق موسمی حالات کی وجہ سے پھنس گئے ہیں۔ بالائی ہنزہ کے پہاڑوں اور خنجراب پاس پر بھی برفباری کی اطلاع ہے۔
آئندہ 24 گھنٹوں کی پیش گوئی
محکمہ موسمیات نے آئندہ 24 گھنٹوں کے دوران ملک بھر میں مزید بارش اور برفباری کی پیش گوئی کی ہے۔
