بھارت (اصل میڈیا ڈیسک) بالی وڈ کی متعدد شخصیات کی طرح بھارتی ٹیلی ویژن اداکارہ اور بگ باس او ٹی ٹی کی سابقہ کنٹسٹنٹ عرفی جاوید بھی آریان خان کی حمایت میں بول پڑیں۔
بھارتی میڈیا رپورٹس کے مطابق عرفی جاوید کا کہنا ہے کہ شاید آریان کو اس صدمے سے نکلنے میں خاصا وقت لگے کیوں کہ عدالتی فیصلہ آنے سے قبل ہی لوگوں نے آریان پر صرف اس لیے تنقید شروع کر دی کہ وہ شاہ رخ خان کا بیٹا ہے۔
بھارتی اداکارہ کا کہنا تھا کہ ہم زیادتی اور قتل کے واقعات پر بھی ایسا ہی غصہ کیوں نہیں دکھاتے؟ ہم عدالت کے فیصلے سے پہلے ہی اداکاروں کو شرمندہ کرنے میں جلدی کرتے ہیں لیکن جب عصمت دری کرنے والوں کو شرمندہ کرنے کی بات آتی ہے تو ہم اتنی جلدی کیوں نہیں کرتے؟
خیال رہے کہ اس سے قبل بھارتی اداکار کمال راشد خان نے بھی این سی بی پر تنقید کرتے ہوئے آریان کا دفاع کیا تھا اور کہا تھا کہ آریان کی جان خطرے میں ہے جس کے لیے میری دعائیں ان کے ساتھ ہیں۔
این سی بی نے 2 اکتوبر کو ممبئی کے ساحل پر ایک کروز شپ پر ہونے والی پارٹی پر چھاپہ مار کر شاہ رخ خان کے بیٹے سمیت 8 افراد کو گرفتار کیا تھا۔
عدالت نے آریان خان کی درخواست ضمانت پر سماعت 20 اکتوبر تک ملتوی کی ہے جس کے بعد اب آریان مزید وقت جیل میں گزار رہے ہیں۔