ابوظہبی (جیوڈیسک) آسٹریلیا نے پاکستان کو مسلسل تیسرے ایک روزہ میچ میں شکست دے کر 5 میچوں کی سیریز میں 0-3 کی فیصلہ کن برتری حاصل کر لی۔
کینگروز کے 267 رنز کے ہدف کے تعاقب میں پاکستان کی پوری ٹیم 45 ویں اوور میں 186 رنز پر ڈھیر ہوئی اور اسے 80 رنز سے شکست کا سامنا کرنا پڑا۔
ابوظہبی کرکٹ اسٹیڈیم میں کھیلے گئے میچ میں آسٹریلوی کپتان ایرون فنچ نے ٹاس جیت کر پہلے بیٹنگ کا فیصلہ کیا تو اوپنر عثمان خواجہ پہلے ہی اوور میں بغیر کوئی رن بنائے کلین بولڈ ہوئے۔
دوسرے آؤٹ ہونے والی کھلاڑی مارش تھے جو 14 رنز بناکر جنید خان شکار بنے۔
تیسری وکٹ کی شراکت میں پیٹرہینڈزکومب اور کپتان فنچ نے شاندار کھیل پیش کیا اور 84 رنز بنائے تاہم 104 کے مجموعی اسکور پر ہینڈز کومب بھی پویلین لوٹ گئے۔
ایرون فنچ اور میکسویل کی شاندار بیٹنگ کے بدولت آسٹریلیا نے مقررہ 50 اوورز میں 6 وکٹوں کے نقصان پر 266 رنز بنائے۔ ایرون فنچ 90، میکسویل 71 اور ہینڈزکومب 47 رنز بناکر نمایاں رہے۔
گرین شرٹس کی جانب سے عثمان شنواری، جنید خان، یاسر شاہ، عماد وسیم اور حارث سہیل نے ایک ایک کھلاڑی کو آؤٹ کیا۔
آسٹریلیا کے 267 رنز کے ہدف کے تعاقب میں گرین شرٹس کی جانب سے اننگز کا آغاز امام الحق اور شان مسعود نے کیا لیکن اوپنر جوڑی رنز بنانے میں ناکام رہی اور پہلی وکٹ شان مسعود کی 14 کے مجموعی اسکور پر گری۔
اننگز کے ساتویں اوور میں حارث سہیل اور محمد رضوان پویلین لوٹے جب کہ امام الحق بھی 46 رنز بناکر آؤٹ ہوئے۔
96 رنز کے مجموعی اسکور پر آدھی ٹیم کے آؤٹ ہونے کے بعد عمر اکمل اور عماد وسیم نے کینگروز کی بولنگ کے خلاف مزاحمت کی کوشش کی لیکن 53 رنز کی پارٹنرشپ کے بعد عمر اکمل جیسن بیہرنڈوف کا شکار بنے۔
پاکستان کی پوری ٹیم 45 ویں اوور میں 186 رنز پر ڈھیر ہوگئی اور اسے مسلسل تیسرے میچ ناکامی کا سامنا کرنا پڑا، اس ناکامی کے بعد سیریز میں مہمان ٹیم کو 0-3 کی فیصلہ کن برتری حاصل ہوگئی ہے۔
گرین شرٹس کی جانب سے امام الحق 46، عماد وسیم 43، عمر اکمل 36 اور شعیب ملک 32 رنز بناکر نمایاں رہے۔ کینگروز کی جانب سے ایڈم زمپا نے 4 اور پیٹ کمنز نے 3 کھلاڑیوں کو آؤٹ کیا۔
