کراچی (اصل میڈیا ڈیسک) ڈپٹی گورنر اسٹیٹ بینک کا کہنا ہے کہ طلب اور رسد کی وجہ سے ڈالر کے ریٹ میں اضافہ ہوا۔
سینیٹر طلحہ محمود کی زیر صدارت قائمہ کمیٹی برائے خزانہ کا اجلاس ہوا، جس میں ڈپٹی گورنر اسٹیٹ بینک نے قائمہ کمیٹی کو بریفنگ دی۔
ڈپٹی گورنر اسٹیٹ بینک کا کہنا تھا کہ بیلنس آف پیمنٹ کے دباؤ اور افغانستان کی صورت حال کی وجہ سے ڈالرکی قیمت بڑھی اور طلب اور رسد کی وجہ سے بھی ڈالر کے ریٹ میں اضافہ ہوا۔
سینیٹر شیری رحمان نے کہا کہ اسٹیٹ بینک ڈالر کے ریٹ سے متعلق کچھ بتانے کو تیار نہیں ، وزارت خزانہ کو جواب دینا چاہیے کہ ڈالر 170 کا کیوں ہوگیا ہے۔
چیئرمین کمیٹی طلحہ محمود کا کہنا تھا کہ جب شوکت ترین وزیر خزانہ بنے تھے تو ڈالر 153 روپے کا تھا،آج 170 روپے تک پہنچ چکا ہے۔
خیال رہے کہ روپے کے مقابلے میں ڈالر کی اونچی اڑان کا سلسلہ جاری ہے اور ڈالر تاریخ کی نئی بلندی پر پہنچ گیا ہے، انٹربینک میں کاروبار کی بندش پر ڈالر 169 روپے 11 پیسے ہو گیا ہے۔
