اسلام آباد: اسلام آباد کی فوڈ اتھارٹی نے ایک کارروائی کے دوران ترنول کے علاقے سے بڑی مقدار میں گدھے کا گوشت برآمد کر لیا۔ فوڈ اتھارٹی کی جانب سے جاری کردہ بیان کے مطابق یہ کارروائی اتوار کے روز ایک کیفے پر کی گئی جہاں سے 25 من گدھے کا گوشت برآمد ہوا۔
پولیس کے مطابق موقع پر موجود ایک غیر ملکی شخص کے خلاف مقدمہ درج کر لیا گیا ہے۔ یہ مقدمہ اسلام آباد کیپیٹل ٹیریٹری فوڈ سیفٹی ایکٹ 2021 کے تحت درج کیا گیا جس میں غیر قانونی طور پر خوراک فروخت کرنے، غیر معیاری خوراک اور غیر محفوظ جگہ پر خوراک رکھنے کے الزامات شامل ہیں۔
پہلی اطلاع رپورٹ (ایف آئی آر) کے مطابق موقع سے 1000 کلوگرام گدھے کا گوشت برآمد ہوا۔ پولیس کے ترجمان نے بتایا کہ گدھے کے گوشت کی سپلائی کے حوالے سے تحقیقات جاری ہیں اور مقامی افراد کی تلاش کی جا رہی ہے جو اس گھناؤنے کاروبار میں ملوث ہیں۔
پولیس کے ترجمان نے مزید بتایا کہ گوشت کے نمونے لیبارٹری بھیجے جا رہے ہیں تاکہ ان کا تجزیہ کیا جا سکے۔ فریج میں رکھے گئے سامان کو بھی خراب اور ناقابلِ استعمال پایا گیا۔ تحقیقات کے لئے ایک کمیٹی تشکیل دی گئی ہے جو یہ جاننے کی کوشش کرے گی کہ گوشت کن علاقوں میں تقسیم کیا گیا۔
یاد رہے کہ اس سال مارچ میں مظفرگڑھ کے ریا ض آباد چوک میں بھی 20 من مردہ جانوروں کا گوشت برآمد کیا گیا تھا جس پر پولیس نے کارروائی کی۔
