پیرس: فرانس کے مشہور اداکار جیرارڈ ڈیپارڈیو کو ایک نوجوان اداکارہ شارلٹ آرنولڈ پر سن 2018 میں واقع ہونے والے جنسی حملوں کے مقدمے میں کرمنل کورٹ میں پیش ہونے کا حکم دیا گیا ہے۔ اس فیصلے کے خلاف اداکار کی جانب سے اپیل کی جا سکتی ہے۔
شارلٹ آرنولڈ نے بدھ کے روز ایک انٹرویو میں کہا کہ انہیں اس عدالتی فیصلے پر “سکون” محسوس ہو رہا ہے۔ ان کا کہنا تھا کہ “سات سال کا عرصہ مکمل جہنم گزرا ہے۔ میں ایسی گہرائیوں میں گئی جہاں سے واپسی ممکن نہیں لگتی تھی۔ اب عدالتی سچائی کی طرف بڑھ رہے ہیں”۔
واقعات اگست 2018 کے ہیں جب 22 سالہ شارلٹ نے اداکار کے پیرس کے گھر پر اس وقت جنسی حملوں کا نشانہ بننے کی شکایت کی تھی۔ شارلٹ کے مطابق وہ ڈیپارڈیو کو “خاندانی دوست” اور “فلمی والد” سمجھتی تھیں جس پر انہیں مکمل بھروسہ تھا۔
انہوں نے بتایا کہ “گھر پہنچنے کے محض 15 منٹ بعد سب کچھ بدل گیا۔ انہوں نے حیران کن سوالات پوچھنے کے بعد مجھ پر جنسی حملہ کیا”۔ شارلٹ کے وکیل کا کہنا ہے کہ یہ ڈیپارڈیو کا “حربہ” ہے اور اس سے قبل بھی بیس سے زائد خواتین نے اداکار کے خلاف ایسی ہی شکایات درج کرائی ہیں۔
ڈیپارڈیو کے وکیل جیریمی اسوس نے اس فیصلے کے خلاف اپیل کرنے کا اعلان کیا ہے۔ شارلٹ کا کہنا ہے کہ “ان کے پاس پیسہ ہے اور وہ مقدمہ لمبا کھینچ سکتے ہیں، لیکن مجھے سچائی پر یقین ہے اور میں عدالت کے لیے تیار ہوں”۔
اس مقدمے کی پیرس کی عدالت میں سماعت ہونا باقی ہے جسے فرانس کی میڈیا میں نمایاں کوریج مل رہی ہے۔
