ہیمبرگ، جرمنی کے مرکزی ریلوے اسٹیشن پر چاقو کے حملے میں کم از کم بارہ افراد زخمی ہوگئے ہیں۔ پولیس کے مطابق یہ حملہ جمعہ کے روز ہوا جب ایک مشتبہ شخص نے چاقو کے وار کرکے کئی افراد کو زخمی کردیا۔ پولیس نے فوری کارروائی کرتے ہوئے مشتبہ شخص کو حراست میں لے لیا ہے۔
ہیمبرگ کے فائر بریگیڈ کے ترجمان کے مطابق زخمیوں میں سے تین افراد کو معمولی زخم آئے ہیں جبکہ تین کی حالت تشویشناک ہے اور چھ دیگر کی زندگی کو خطرہ لاحق ہے۔ واقعے کے بعد امدادی ٹیموں اور پولیس کی بڑی تعداد کو جائے وقوعہ پر دیکھا گیا، جہاں انہوں نے فوری طور پر طبی امداد فراہم کی۔
جرمن اخبار کے مطابق یہ حملہ ریلوے اسٹیشن کے پلیٹ فارم پر ہوا۔ متاثرین میں سے کچھ کو ٹرینوں میں ہی طبی امداد دی جارہی ہے۔ واقعے کے بعد پولیس نے مشتبہ عورت کو گرفتار کیا جسے کئی اہلکاروں نے اسٹیشن سے باہر لے جاتے ہوئے دیکھا گیا۔ ابھی تک حملے کی وجوہات کا علم نہیں ہوسکا ہے۔
یہ واقعہ ہیمبرگ کے مرکزی علاقے میں پیش آیا جہاں دن کے اوقات میں لوگوں کی بڑی تعداد موجود ہوتی ہے۔ پولیس اور سیکیورٹی ادارے واقعے کی تفتیش کر رہے ہیں تاکہ اس حملے کے پس پردہ محرکات کا پتہ لگایا جاسکے۔ جرمنی میں حالیہ دنوں میں چاقو حملوں کی وارداتوں میں اضافہ دیکھنے میں آیا ہے، جس کی وجہ سے مقامی انتظامیہ اور عوام میں تشویش پائی جاتی ہے۔
