لاہور (جیوڈیسک) اداکار ہمایوں سعید کی سائنس فکشن فلم’’پراجیکٹ غازی‘‘ کی تشہیری مہم آخری مرحلے میں داخل ہو گئی۔
پاکستانی فلمی صنعت کی جدید ٹیکنالوجی سے مزین نئی فلم “پراجیکٹ غازی” کی تشہیری مہم آخری مرحلے میں داخل ہو گئی ہے۔ فلم کی اسٹار کاسٹ اداکار ہمایوں سعید اور سائرہ شہروز اپنی آنے والی سائنس فکشن فلم ” پراجیکٹ غازی ” کی تشہیر کیلئے لاہور پہنچے۔ اس موقع پر فلم کے لیڈ اسٹار ہمایوں سعید ، سائرہ شہروز ، ڈائریکٹر سید محمد علی شاہ اور ڈسٹری بیوٹر شیخ عابد موجود تھے۔
سپر اسٹار ہمایوں سعید اور سائرہ شہروز نے فلم کی پروڈکشن اور موضوع کے حوالے سے بلاگرز اور صحافیوں کے سوالات کے جوابات دیتے ہوئے بتایا کہ ’’پراجیکٹ غازی‘‘ منفرد آئیڈیے اور جدید اسپیشل ایفیکیٹس پر مبنی ایک شاندار فلم ہے جس میں تمام کرداروں کو یکساں اہمیت دی گئی ہے، جبکہ پوسٹ پروڈکشن کے دوران تمام پہلوؤں پر بطور خاص توجہ دی گئی ہے تاکہ شائقین کو ایک بہترین اور معیاری پراڈکٹ میسر ہوسکے اور وہ فیملیز کے ہمراہ پیسہ وصول تفریح حاصل کر سکیں۔
تشہیری مہم کے دوران شائقین کی بڑی تعداد بھی جمع ہو گئی جنہوں نے اپنے پسندیدہ ستاروں کے ساتھ دل کھول کر سیلفیاں بھی لیں۔ واضح رہے کہ فلم جمعہ 29 مارچ کو سینما گھروں کی زینت بنے گی۔
