محکمہ موسمیات نے اعلان کیا ہے کہ شدید مون سون کی لہریں سندھ کے مختلف علاقوں میں داخل ہو رہی ہیں، جس کے نتیجے میں کراچی سمیت متعدد شہروں میں ہفتے کے آغاز پر زوردار بارشوں اور طوفانی ہواؤں کا امکان ہے۔ موسمیاتی ادارے کے مطابق، بھارتی ریاست راجستھان میں بننے والا گہرا دباؤ سندھ کے جنوب مشرقی علاقوں میں داخل ہوگا، جس سے 10 ستمبر تک موسلا دھار بارشیں ہونے کا خطرہ ہے۔
محکمہ موسمیات کے ترجمان انجم نذیر زئیغم کے مطابق، کراچی میں پیر کے روز گرج چمک کے ساتھ بارش ہوگی جبکہ کچھ مقامات پر زیادہ بارشیں ریکارڈ کی جا سکتی ہیں۔ شہر میں اتوار کو ہلکی بارش کے ساتھ بادل چھائے رہے، جبکہ درجہ حرارت 32.6 ڈگری سیلسیس اور نمی 75 فیصد رہی۔
محکمہ موسمیات نے حیدرآباد، ٹھٹہ، بدین، سجاول، دادو اور میرپور خاص میں بھی بارشوں اور تیز ہواؤں کی پیش گوئی کی ہے۔ صدر آصف علی زرداری نے صوبائی، ضلعی اور بلدیاتی اداروں کو الرٹ رہنے اور ہب ڈیم سمیت تمام آبی ذخائر کی نگرانی کرنے کی ہدایت جاری کی ہے۔
