کراچی (اصل میڈیا ڈیسک) سندھ کے وزیر بلدیات ناصر حسین شاہ نے کراچی کو 14 سال میں ایک بھی بڑا ٹرانسپورٹ منصوبہ نہ دینے پر معذرت کر لی ہے۔
ناصر حسین شاہ کا کہنا تھا کہ حکومت سندھ نے بسیں لانے کے لیے مختلف منصوبے بنائے لیکن انہیں مکمل کرنے میں ناکام رہے، کراچی کو کوئی بڑا ٹرانسپورٹ منصوبہ نہ دینے پر معذرت خواہ ہیں۔
وزیر بلدیات کا کہنا تھا کہ وفاقی حکومت کی طرف سے 2013 کے بعد کوئی سپورٹ نہیں ملی، اگر وفاقی حکومت صوبوں کو سپورٹ نہیں کرے گی تو مسائل پیدا ہوں گے۔
ناصر حسین شاہ کا کہنا تھا کوشش ہے اگلے سال جنوری یا فروری میں ریڈلائن کا سنگ بنیاد رکھ دیا جائے اور 200 بسیں بھی کراچی آ جائیں۔
صوبائی وزیر کا کہنا تھا کہ اپوزیشن کے کہنے پر بلدیاتی قانون میں ٹاؤن سسٹم کا مطالبہ مان لیا ہے، واٹر بورڈ اور سالڈ ویسٹ منیجمنٹ میں میئر کا کردار مانگا گیا وہ بھی دے دیا ہے۔
ان کا مزید کہنا تھا کہ سندھ بلدیاتی بل میں منتخب نمائندوں کو زیادہ اختیارات دیے گئے ہیں۔
