راولپنڈی: بلوچستان کے اضلاع کلات اور گوادر میں سیکیورٹی فورسز کی انٹیلیجنس بیسڈ کارروائیوں کے دوران پاک فوج کے ایک میجر نے شہادت کا عظیم مرتبہ حاصل کیا جبکہ بھارت کی سرپرستی میں کام کرنے والے دہشت گرد گروہ کے چار دہشت گرد مارے گئے۔
پاک فوج کے شعبہ تعلقات عامہ (آئی ایس پی آر) کے مطابق میجر وجاہت وحید گوادر ضلع کی تحصیل پسنی میں کلیئرنس آپریشن کے دوران بارودی سرنگ (آئی ایڈ) کے دھماکے میں شہید ہوئے۔
کلات میں انٹیلیجنس بیسڈ آپریشن
آئی ایس پی آر کے مطابق انٹیلیجنس ایجنسیوں نے کلات ضلع کے علاقے جٹک آباد اور گوادر کی تحصیل پسنی کے علاقے شادی کور میں بھارت کی سرپرستی میں کام کرنے والے دہشت گردوں کے متعدد ٹھکانوں کی موجودگی کی اطلاع دی تھی، جو مقامی آبادی کے لیے خطرہ تھے۔
ترجمان کے مطابق 18 اکتوبر کو سیکیورٹی فورسز نے کلات کے علاقے جٹک آباد میں انٹیلیجنس بیسڈ آپریشن کیا۔ اس کارروائی کے دوران دہشت گردوں کے ٹھکانے کو مؤثر طریقے سے نشانہ بنایا گیا اور شدید فائرنگ کے تبادلے کے بعد چار دہشت گرد ہلاک ہو گئے۔
کارروائی کے دوران علاقے سے بھاری مقدار میں اسلحہ اور گولہ بارود بھی برآمد کیا گیا۔
پسنی میں کلیئرنس آپریشن اور شہادت
پاک فوج کے ترجمان کے مطابق گوادر ضلع کی تحصیل پسنی کے علاقے شادی کور میں دہشت گردوں کی بیخ کنی اور علاقے کو محفوظ بنانے کے لیے کلیئرنس آپریشن جاری تھا کہ سیکیورٹی فورسز کی ٹکڑی کو بارودی سرنگ (آئی ایڈ) سے نشانہ بنایا گیا۔
دھماکے کے نتیجے میں اسکواڈ کی قیادت کرنے والے 34 سالہ میجر وجاہت وحید نے جام شہادت نوش کیا۔ میجر وجاہت وحید کا تعلق لاہور سے تھا اور انہوں نے فرض کی ادائیگی کے دوران وطن کے دفاع میں اپنی جان قربان کی۔
وفاقی وزیر داخلہ کا خراج عقیدت
ادھر وفاقی وزیر داخلہ محسن نقوی نے کلات اور پسنی میں عسکریت پسندوں کے خلاف سیکیورٹی فورسز کی کارروائیوں پر خراج عقیدت پیش کیا اور پسنی میں آئی ایڈ دھماکے میں شہید ہونے والے میجر وجاہت وحید کے انتقال پر تعزیت کا اظہار کیا۔
اپنے بیان میں وزیر داخلہ نے میجر وجاہت وحید کو خراج عقیدت پیش کیا اور سوگوار خاندان سے دلی ہمدردی اور تعزیت کا اظہار کیا۔
محسن نقوی نے کہا کہ میجر وجاہت نے ملک میں امن کے لیے اپنی جان قربان کی اور اپنی شہادت کی بدولت ہمیشہ زندہ رہیں گے۔ انہوں نے کہا کہ میجر وجاہت اور دیگر شہداء کے خون کا ہر قطرہ ملک کی سلامتی اور تحفظ کی ضمانت ہے۔
وزیر داخلہ نے کہا کہ میجر وجاہت ہمیشہ قوم کے دلوں میں زندہ رہیں گے اور قوم شہید افسر کی عظیم قربانی کو ہمیشہ یاد رکھے گی۔
