لاہور (اصل میڈیا ڈیسک) 46 فیصد پاکستانیوں نے وفاقی وزیر تعلیم شفقت محمود کی کارکردگی کو توقعات سے خراب کہا ہے۔
اپسوس پاکستان کے تازہ ترین سروے میں وزارت تعلیم کے سربراہ شفقت محمود، این سی او سی، وزیر اعظم کے معاون خصوصی برائے صحت ڈاکٹر فیصل سلطان اور عدلیہ کی کارکردگی کو پاکستانی عوام نے توقعات سے خراب قرار دیا۔
اس سروے میں ملک بھر سے 1100 سے زائد افراد نے حصہ لیا۔
سروے میں 46 فیصد پاکستانیوں نے وزیر تعلیم شفقت محمود کی کارکردگی کو توقعات سے خراب کہا ہے جب کہ 14فیصد نے کارکردگی کو توقع سے بہتر قرار دیا۔
40 فیصد عوام نے کہا کہ جیسی توقع تھی شفقت محمود نے ویسے ہی کام کیا۔
سروے میں 45 فیصد نے وزارتِ تعلیم کی کارکردگی کو توقعات سے خراب قرار دیا، 18 فیصد نے توقعات سے بہتر جبکہ 37 فیصد نے جیسی توقع تھی ویسی ہی کارکردگی ہونے کا کہا۔
اپسوس کے مطابق 40 فیصد پاکستانی این سی او سی کی کارکردگی کو بھی توقعات سے خراب کہتے نظر آئے، 21 فیصد نے توقعات سے بہتر کہا اور 39 فیصد نے جیسی کارکردگی کی توقع تھی ویسی ہی ہونے کا کہا۔
وزیر اعظم کے معاون خصوصی برائے صحت ڈاکٹر فیصل سلطان کی کارکردگی کو 45 فیصد پاکستانیوں نے توقعات سے خراب کہا، 16 فیصد نے بہتر کہا جب کہ 39 فیصد نے جیسی کارکردگی کی توقع تھی ویسی ہی ہونے کا کہا۔
سروے میں عدلیہ کی کارکردگی کو 47 فیصد پاکستانیوں نے توقعات سے خراب قرار دیا، 15 فیصد نے توقعات سے بہتر جب کہ 38 فیصد نے کہا کہ جیسی توقع تھی ویسی ہی کارکردگی ہوئی۔
