راولپنڈی (اصل میڈیا ڈیسک) وفاقی وزیر داخلہ شیخ رشید کا کہنا ہے کہ اپوزیشن اندھی مچھلیوں کی طرح ان ہاؤس تبدیلی کے خواب دیکھ رہی ہے۔
میڈیا سے گفتگو کرتے ہوئے شیخ رشید کا کہنا تھا کہ عمران خان کے خلاف تحریک عدم اعتماد سے متعلق سوال پر شیخ رشید کا کہنا تھا کہ فنانس بل پر ان کے 12 افراد کم ہو گئے، اب تحریک عدم اعتماد آئی تو ان کے 26 ووٹ کم ہو جائیں گے، آپ تقریریں کر سکتے ہیں کر لیں لیکن ناکامی آپ کا مقدر ہے، دوسری بار کہہ رہا ہوں کہ چاروں شریف سیاست سے مائنس ہیں۔
ان کا کہنا تھا میں نے کہا تھا کہ فنانس بل پاس ہو جائے گا، کہتے ہیں فنانس بل اسے لیے پاس ہوگیا کہ فون کال آئی، آپ پوری اسمبلی کو اغوا کرکے مری لے گئے کبھی چھانگا مانگا لے گئے، یہ اندھی مچھلیوں کی طرح ان ہاؤس تبدیلیوں کے خواب دیکھ رہے ہیں۔
ان کا کہنا تھا کہ سیاستدان اپنی بات اپنے اصول کے ساتھ جیتا اور مرتا ہے، فون کال کیا چیز ہے، جو یہ باتیں کر رہے ہیں وہ سب چھانگا مانگا کی پیداوار ہیں۔
ایک سوال کے جواب میں شیخ رشید کا کہنا تھا کہ سیاسی پارٹیوں میں اختلافات ہوتے ہیں، یہ ہلکی پھلکی موسیقی ہے،کوئی پکا راگ نہیں ہے۔
سانحہ مری سے متعلق سوال پر وزیر داخلہ کا کہنا تھا کہ اگر مری نہ جاتا تو وہاں 23 کی جگہ 30، 40 ہلاکتیں ہو جاتیں، مری میں رینجرز کو اس لیے طلب کیا کیونکہ کوئی پولیس کی بات نہیں سن رہا تھا۔
آئی ایم ایف کے پاس جانے سے متعلق سوال پر وفاقی وزیر کا کہنا تھا کہ پاکستان آئی ایم ایف کے پاس پہلی بار نہیں گیا، آئی ایم ایف کی سختی اس وجہ سے زیادہ ہوئی کیونکہ خزانے پر بوجھ زیادہ تھا۔
نواز شریف سے متعلق سوال پر شیخ رشید کا کہنا تھا جو بیمار ہونے کا ڈرامہ کرتے ہیں میرا تجربہ ہے کہ وہ بیمار ہو جاتے ہیں، بہت سے سیاستدان دیکھے ہیں جو اپنی دھرتی میں مرتے ہیں، اپنی دھرتی کی جیل کو سسرال سمجھتے ہیں، کوئی ڈیل نہیں ہو رہی، اب تو ڈھیل بھی نہیں ہو رہی۔
ایک اور سوال کے جواب میں وزیر داخلہ کا کہنا تھا کہ میں مولانا فضل الرحمان کا نام احترام سے ہی لیتا رہوں گا۔
شیخ رشید کا کہنا تھا وزیراعظم کہہ چکے ہیں کہ اگلے دو تین ماہ بہت اہم ہیں، اپریل کے بعد حالات ٹھیک ہو جائیں گے، مجھے اپوزیشن کوئی ٹف ٹائم دیتی نظر نہیں آتی۔
اپوزیشن جماعتوں کے حکومت مخالف مارچ کے حوالے سے وفاقی وزیر شیخ رشید کا کہنا تھا کہ دو کی جگہ تین مارچ کر لیں کچھ نہیں ہو گا، پہلے بھی اپوزیشن کے لیے راستے کھلے تھے اور اب بھی آئے تو راستے کھلے ہوں گے، اپوزیشن نے کوئی ایسا کام نہ کیا تو راستے کھلے ہوں گے۔
انہوں نے مزید کہا کہ پیٹرول دنیا بھر میں مہنگا ہے لیکن ہمارا مسئلہ مہنگائی کا ہے، مہنگائی کے مسئلے کو عمران خان اپریل مئی میں حل کر دیں گے، اپوزیشن کو شکست ہو گی اور عمران خان پانچ سال پورے کریں گے۔
شہباز شریف کی جانب سے خود کو عمران خان کے لیے ڈراؤنا خواب کہنے سے متعلق سوال پر شیخ رشید کا کہنا تھا کہ شہباز شریف عمران خان کا سہانہ خواب ہیں، یہ بزدلوں کا گروہ ہے جو پیسے بنانے کے لیے سیاست کرتے رہے ہیں۔
