کولمبو میں پریس کانفرنس کے دوران قائد پاکستان نے بڑے میچ سے قبل ٹیم کی تیاری اور حکمت عملی سے پردہ اٹھایا
کولمبو: پاکستان کے قومی ٹی20 ٹیم کے کپتان سلمان علی آغا نے بھارت کے خلاف کل ہونے والے عالمی کپ کے اہم میچ سے قبل اسپنر عثمان طارق کو ٹیم کا ’ٹرمپ کارڈ‘ قرار دیتے ہوئے انکشاف کیا ہے کہ حریف کی پوری پلےنگ الیون کے لیے مخصوص پلان تیار کر رکھے ہیں۔ کولمبو میں صحافیوں سے بات کرتے ہوئے انہوں نے کہا کہ ٹیم کو اچھی کرکٹ کھیلنی ہے اور وہ اس کے لیے مکمل طور پر تیار ہیں۔
’’عثمان طارق پر تنقید کا کوئی اثر نہیں، وہ دو بار کلیئر ہو چکے‘‘
سلمان علی آغا نے عثمان طارق کے بولنگ ایکشن پر ہونے والی مسلسل تنقید پر ردعمل دیتے ہوئے کہا، ’’عثمان طارق کے ایکشن پر بات چلتی رہی ہے۔ وہ دو مرتبہ کلیئر ہو چکے ہیں۔ پتا نہیں اس پر بات کیوں ہو رہی ہے۔ لیکن عثمان پر اس سب کا کوئی اثر نہیں پڑتا۔ ہم کسی کی رائے کو روک نہیں سکتے، سب کو اجازت ہے۔‘‘ انہوں نے مزید کہا، ’’ہمارے لیے یہ سب کھلاڑی ایک جیسے ہیں۔ عثمان طارق کو آپ سب نے بنایا، وہ ہمارے لیے ٹرمپ کارڈ ہیں۔‘‘
بارش کی صورت میں بھی متبادل پلان موجود
کپتان نے موسمی حالات سے نمٹنے کی تیاری کا بھی ذکر کیا۔ ان کا کہنا تھا، ’’کل بھی ایک بڑے لیول کا میچ ہوگا۔ ہم تیار ہیں، ہمیں اچھی کرکٹ کھیلنی ہے۔ یہاں کی کنڈیشنز سے ہم آہنگ ہیں اور پچ کا بھی علم ہے۔ بارش کا کچھ نہیں کر سکتے، اگر بارش کی وجہ سے اوور کم ہوتے ہیں تو اس کا بھی پلان کر رکھا ہے۔‘‘
’’تمام 15 کھلاڑی اہم، کنڈیشن دیکھ کر الیون کا فیصلہ ہوگا‘‘
سلمان علی آغا نے پلےنگ الیون کے حوالے سے واضح کیا کہ فائنل ٹیم کا فیصلہ میدان کی حالت دیکھ کر کیا جائے گا۔ انہوں نے کہا، ’’میرے لیے تمام 15 کھلاڑی اہم ہیں، کوئی بھی کھیل سکتا ہے۔ کنڈیشنز کو دیکھ کر ہی اپنی پلیئنگ الیون بنائیں گے۔ بابر اعظم رنز کر رہے ہیں، ہمارے لیے پریشانی کی بات نہیں ہے۔ امید ہے بابر اعظم کل بھی رنز کریں گے۔‘‘
ماضی کے ریکارڈ سے سبق، بھارت کی ہر بیٹسمین کے لیے پلان
ایک سوال کے جواب میں کپتان نے ورلڈ کپ میں بھارت کے خلاف پاکستان کے کمزور ریکارڈ کا اعتراف کرتے ہوئے کہا، ’’انڈیا کے خلاف ہمارا ورلڈ کپ میں پاکستان کا ریکارڈ اچھا نہیں رہا، لیکن ہم نے تاریخ سے سیکھا ہے اور کوشش ہو گی کہ کل اچھا کھیلیں۔ انڈیا کی پوری پلےنگ الیون کے لیے پلان کیا ہوا ہے۔‘‘
ابھیشک شرما کی فٹنس پر خوشی کا اظہار
بھارت کے جارح بیٹسمین ابھیشک شرما کی فٹنس کے بارے میں پوچھے گئے سوال پر سلمان علی آغا نے کہا، ’’امید ہے ابھیشک کی ری کوری اچھی ہو رہی ہو گی اور وہ اپنی ٹیم کو دستیاب ہوں گے۔‘‘
کپتانی کی ذمہ داری اور دباؤ کو تسلیم
اپنے کردار کے حوالے سے انہوں نے کہا، ’’جب آپ کپتانی کر رہے ہوتے ہیں تو یہ اضافی ذمہ داری ہوتی ہے، دباؤ بھی ہوتا ہے۔ آپ ملک کی نمائندگی کر رہے ہوتے ہیں تو سب کی نظریں آپ پر ہوتی ہیں۔ ہمیں میدان میں اچھی کرکٹ کھیلنی ہو گی۔‘‘
کل ہونے والا یہ میچ گروپ اسٹیج کا ایک اہم مقابلہ ہوگا جس کے نتائج دونوں ٹیموں کی آگے کی راہ متعین کریں گے۔
