اسلام آباد: وزارت مذہبی امور نے قومی اسمبلی میں نجی حج اسکیم کے تحت 16 مختلف پیکجز کی تفصیلات پیش کرتے ہوئے بتایا ہے کہ حاجیوں کے لیے کم از کم فیس 14 لاکھ روپے اور زیادہ سے زیادہ 37 لاکھ 50 ہزار روپے مقرر کی گئی ہے۔
وزارت کے مطابق نجی حج اسکیم کے تحت پیکجز کو تین اقسام میں تقسیم کیا گیا ہے، جن میں اکانومی، اسٹینڈرڈ اور پریمیم آپشنز شامل ہیں۔
اکانومی پیکج
قومی اسمبلی میں پیش کی گئی تفصیلات کے مطابق اکانومی حج پیکج کی قیمت 14 لاکھ روپے سے 17 لاکھ 50 ہزار روپے کے درمیان رکھی گئی ہے۔ یہ آپشن کم بجٹ رکھنے والے حاجیوں کے لیے دستیاب ہوگا۔
اسٹینڈرڈ پیکج
اسٹینڈرڈ حج پیکج کی فیس 18 لاکھ 40 ہزار روپے سے 23 لاکھ 40 ہزار روپے تک مقرر کی گئی ہے۔ اس زمرے میں سہولیات کے لحاظ سے درمیانے درجے کی خدمات فراہم کی جائیں گی۔
پریمیم پیکج
پریمیم حج پیکج سب سے مہنگا آپشن ہے، جس کی قیمت 25 لاکھ 50 ہزار روپے سے 37 لاکھ 50 ہزار روپے کے درمیان ہے۔ اس پیکج میں اعلیٰ درجے کی سہولیات فراہم کرنے کا اعلان کیا گیا ہے۔
وزارت مذہبی امور کی جانب سے قومی اسمبلی میں پیش کی گئی یہ تفصیلات ایسے وقت میں سامنے آئی ہیں جب عازمین حج کو درپیش اخراجات اور سہولیات کے حوالے سے پارلیمنٹ میں بحث جاری ہے۔
