اسلام آباد: وزیراعظم شہباز شریف نے امریکی صدر ڈونلڈ ٹرمپ کے جنگ بندی میں کردار کو سراہتے ہوئے کہا کہ صدر ٹرمپ نے ثابت کیا کہ وہ امن کے پیامبر ہیں۔ امریکی سفارت خانے میں ایک تقریب کے دوران خطاب کرتے ہوئے وزیراعظم نے کہا کہ پہلگام واقعہ بھارت کا فالس فلیگ آپریشن تھا اور پاکستان نے کشیدہ صورتحال میں تحمل کا مظاہرہ کیا۔ وزیراعظم نے مزید کہا کہ امریکی صدر ٹرمپ نے سرد اور گرم جنگ کے خلاف اہم کردار ادا کیا، اور ان کی کوششیں امن کے فروغ اور اقتصادی روابط میں اضافے کے لیے قابل ستائش ہیں۔
وزیراعظم نے کہا کہ پاک بھارت کشیدگی میں کمی اور جنگ بندی کے لیے دوست ممالک کے بھی شکر گزار ہیں۔ انہوں نے بتایا کہ پاکستان اور بھارت کے درمیان جنگ بندی پر عمل ہو رہا ہے۔ انہوں نے یاد دلایا کہ نائن الیون کے بعد دہشت گردی کے خلاف عالمی جنگ شروع ہوئی تھی اور پاکستان نے 2018 میں دہشت گردی کا مکمل خاتمہ کر دیا تھا۔ دہشت گردی کے خلاف جنگ میں پاکستان نے بھاری جانی و مالی نقصان اٹھایا ہے، جس میں 90 ہزار سے زائد شہادتیں اور 150 ارب ڈالر سے زائد کا اقتصادی نقصان شامل ہے۔
وزیراعظم نے مزید کہا کہ پہلگام واقعے پر بھارت کو غیرجانبدارانہ عالمی انکوائری کی پیشکش کی گئی، لیکن بھارت نے اس کے جواب میں پاکستان پر حملہ کیا۔ بھارت کے ان حملوں میں خواتین اور بچوں کو بھی نشانہ بنایا گیا، جبکہ پاکستان نے اپنے دفاع میں بھارت کے 6 جہاز مار گرائے۔ پاکستان ہمیشہ خطے میں امن، استحکام اور خوشحالی کا خواہشمند رہا ہے۔
وزیراعظم نے کہا کہ ہماری توجہ معیشت کو مضبوط بنانے پر ہے اور امریکا کے ساتھ اقتصادی تعلقات میں اضافہ کرنے کے لیے اقدامات جاری ہیں۔ انہوں نے کہا کہ پاکستان اور امریکا کے تعلقات ایک نئے دور میں داخل ہو رہے ہیں اور ہم ان تعلقات کو مضبوط بنانے کے لیے پرعزم ہیں، کیونکہ دونوں ممالک جمہوری روایات اور آئین کی بالادستی پر یقین رکھتے ہیں۔
