میاں چنوں (نمائندہ خصوصی) کرائسٹ چرچ نیوزی لینڈ میں مساجد پر دہشت گردانہ حملے اور اِس میں قیمتی جانوں کا ضیاع بدترین نسلی و مذہبی منافرت کا سفاکانہ مظاہرہ ہے جس کی جتنی بھی مذمت کی جائے کم ہے۔اِن خیالات کا اظہار پاکستان کرسچن رائٹرز گلڈ کے سنئیر مرکزی نائب صدر ساحل منیر نے اپنے ایک بیان میں کیا ہے۔
انہوں نے کہا کہ دہشت گردی و انتہا پسندی اِس وقت پوری دنیا کا مسئلہ ہے اور پُر امن بقائے باہمی ہی انسانیت کی بنیادی ضرورت ہے۔مگر شر کی قوتیں امنِ عالم کو تباہ کرنے پر تُلی ہوئی ہیں اور یہ المناک سانحہ بھی اسی سلسلہ کی ایک کڑی ہے۔ انہوں نے کہا کہ دکھ اور کرب کے اس موقع پر ہم متاثرین اور ان کے اہلِ خانہ کے ساتھ دلی ہمدردی کا اظہار کرتے ہیں ۔علاوہ ازیں دنیا بھر کے انسان دوست حلقوں سے اپیل کرتے ہیں کہ نسلی و مذہبی منافرت کے خاتمے اور امن ِ عالم کے فروغ کے لئے اپنا مثبت و موثر کردار ادا کریں کیونکہ انسانیت کو بچانے کا واحد راستہ امن ہے۔
