کراچی (اصل میڈیا ڈیسک) اداکار زاہد احمد اور صبا قمر کا شمار پاکستان کی مشہور آن اسکرین جوڑیوں میں ہوتا ہے اور اب یہ جوڑی ٹی وی پر داد سمیٹنے کے بعد بڑے پردے پر نظر آئے گی۔
ڈراماسیریل ’’زہے نصیب‘‘ اور ’’بے شرم‘‘ سے شہرت حاصل کرنے والے اداکار زاہد احمد نے صباقمر کے ساتھ فلم ڈیبیو کرنے کی تصدیق کی ہے۔ زاہد احمد نے انسٹاگرام پر تصدیق کرتے ہوئے کہا ہاں یہ سچ ہے کہ میں نے اور صبا قمر نے ایک ساتھ فلم سائن کی ہے۔
اپنی پوسٹ میں زاہد احمد نے صبا قمر کو پاکستان کی بہترین اداکارہ قرار دیتے ہوئے کہا کہ شوبز میں کسی چیز کی گارنٹی نہیں دے سکتے لیکن میں اس فلم کو بہترین بنانے کے لئے بھرپور محنت کروں گا۔ زاہد احمد نے فلم میں اداکار سید جبران کے اہم کردار ادا کرنے کی بھی تصدیق کی۔
فلم میں زاہد احمد اورصبا قمر مرکزی کردارادا کررہے ہیں ان کے علاوہ فلم کی دیگر کاسٹ میں نیر اعجازاور سہیل احمد بھی شامل ہیں۔ فلم کا نام ابھی تک فائنل نہیں کیا گیا ہے، تاہم اسے محسن علی نے تحریر کیا ہے جب کہ ثاقب خان فلم کو ڈائریکٹ کررہے ہیں اور حسن ضیا اور جمیل بیگ فلم کے پروڈیوسر ہیں۔ فلم عیدالاضحیٰ کے موقع پر ریلیز کی جائے گی۔
واضح رہے کہ زاہد احمد اور صباقمر کی جوڑی 2016 میں ریلیز ہونے والے ڈرامے ’’بے شرم‘‘ میں ایک ساتھ نظر آئی تھی۔ صبا قمر نے ڈرامے میں سپر ماڈل اور زاہد احمد کی بیوی کا کردارادا کیا تھا۔ اس جوڑی کو پاکستانی شائقین کی جانب سے بے حد پسند کیاگیاتھا اور اب یہ جوڑی چھوٹی اسکرین پر داد سمیٹنے کے بعد اپنا جادو بڑی اسکرین پر بکھیرے گی۔
یاد رہے کہ صبا قمر 2017 میں فلم ’’ہندی میڈیم‘‘ کے ساتھ بالی ووڈ ڈیبیو کرچکی ہیں اور یہ ان کی فلم بلاک بسٹر ثابت ہوئی تھی۔ اس کے علاوہ وہ پاکستانی فلم ’’لاہور سے آگے‘‘ میں بھی اداکاری کے جوہر دکھاچکی ہیں۔ حال ہی میں صبا قمر نے سرمد کھوسٹ کی فلم ’’کملی‘‘ کی شوٹنگ مکمل کی ہے۔ دوسری جانب زاہد احمد کی یہ پہلی فلم ہے اس سے قبل انہوں نے صرف ڈراموں میں کام کیا ہے۔
