آرمی چیف جنرل عاصم منیر نے بلوچستان کے دورے کے دوران کہا ہے کہ نام نہاد دوست نما دشمن کچھ بھی کریں، انہیں شکست ضرور ملے گی۔ انہوں نے قوم اور مسلح افواج کی قوت کی تعریف کرتے ہوئے کہا کہ دشمنوں کو ان کی طاقت سے شکست ہوگی۔
آئی ایس پی آر کے مطابق، آرمی چیف نے بلوچستان کی موجودہ سیکیورٹی صورتحال پر سینیئر سکیورٹی اور انٹیلی جنس حکام سے بریفنگ لی۔ اس موقع پر انہوں نے گورنر اور وزیراعلیٰ بلوچستان کے ہمراہ شہدا کی نماز جنازہ میں بھی شرکت کی۔ آرمی چیف نے سی ایم ایچ کوئٹہ میں زخمی جوانوں کی عیادت کی اور ملک کے دفاع کے لیے ان کے غیر متزلزل عزم کو سراہا۔
آرمی چیف نے مزید کہا کہ دہشت گردی کے خلاف قانون نافذ کرنے والے اداروں کے بہادر افسروں اور جوانوں کی کاوشیں قابل ستائش ہیں۔ انہوں نے بلوچستان کے عوام کی سلامتی اور فلاح و بہبود کو یقینی بنانے کے عزم کا اعادہ کیا اور صوبائی حکومت کی امن و ترقی کے فروغ کی کوششوں میں حمایت کرنے کی یقین دہانی کرائی۔
بلوچستان میں حالیہ کارروائیوں کے نتیجے میں 23 دہشت گرد ہلاک ہوئے جبکہ اس مقابلے میں 18 ایف سی جوان بھی شہید ہوئے۔ آئی ایس پی آر نے بتایا کہ یہ کارروائیاں دہشت گردوں کی جانب سے روڈ بلاک کرنے کی کوشش کے دوران کی گئیں، جن کا مقصد بلوچستان کا پرامن ماحول خراب کرنا تھا۔
آرمی چیف نے اپنے بیان میں کہا کہ ہم اپنے غیر ملکی آقاؤں کے ایجنٹ بن کر دُہری پالیسیوں کی پیروی کرنے والوں سے آگاہ ہیں۔ وطن کے دفاع کے لیے جب بھی ضرورت پڑی، ہم جوابی کارروائی کریں گے۔ انہوں نے کہا کہ یہ لوگ جہاں کہیں بھی ہوں، ان کا پیچھا کیا جائے گا اور یہ قوم اور مسلح افواج کی ثابت قدمی سے ضرور شکست کھائیں گے۔
