میکسیکو سٹی: جمعرات 11 جون کو ایسٹاڈیو ایزٹیکا میں 2026 فیفا ورلڈ کپ کی شاندار افتتاحی تقریب کے دوران کولمبیا کی عالمی شہرت یافتہ گلوکارہ شکیہ نے اپنے نئے گانے ’دائی، دائی‘ سے سماں باندھ دیا۔ لاکھوں شائقین کی موجودگی اور دنیا بھر میں ایک ارب سے زائد ٹیلی ویژن ناظرین کے سامنے ان کی پرفارمنس کو خوب سراہا گیا، لیکن اس کے فوراً بعد سوشل میڈیا پر ایک عجیب و غریب افواہ نے زور پکڑ لیا کہ اسٹیج پر اصلی شکیہ موجود ہی نہیں تھیں۔
دراصل، شکیہ نے اپنی پرفارمنس کے دوران موٹے سیاہ دھوپ کے چشمے پہن رکھے تھے، جس کی وجہ سے وہ کسی لمحے بھی بغیر عینک کے نظر نہیں آئیں۔ یہی وہ وجہ بنی جس نے آن لائن قیاس آرائیوں کی آگ بھڑکا دی۔ بہت سے ناظرین نے یہ یقین کر لیا کہ 80,000 سے زائد تماشائیوں کے سامنے گانا گانے والی خاتون دراصل شکیہ کی ایک انتہائی مشابہت رکھنے والی ڈپلیکیٹ تھی۔
سوشل میڈیا پر قیاس آرائیوں کا طوفان
سوشل میڈیا صارفین نے ثبوت کے طور پر گلوکارہ کے رقص کے مخصوص انداز کو بھی نشانہ بنایا۔ ایک صارف نے مشہور گانے ’ہپس ڈونٹ لائی‘ کا حوالہ دیتے ہوئے طنزیہ انداز میں لکھا، “یہ کولھے جھوٹ بول رہے ہیں۔” ان کا خیال تھا کہ اسٹیج پر موجود خاتون کی کولھوں کی حرکت شکیہ جیسی ماہرانہ نہیں تھی۔
ایک میکسیکن مداح نے اس پورے معاملے پر اپنی تھیوری پیش کرتے ہوئے کہا، “مجھے نہیں معلوم آپ کا کیا خیال ہے لیکن ورلڈ کپ کی افتتاحی تقریب میں جو شکیہ نظر آئیں، وہ بالکل بھی اصلی شکیہ جیسی نہیں ل رہی تھیں۔” اس صارف نے تین ممکنہ وجوہات گنوائیں: یا تو یہ کوئی ڈپلیکیٹ تھی، یا شکیہ نے پلاسٹک سرجری کروائی ہے، یا پھر انہوں نے بہت زیادہ میک اپ کیا ہوا تھا۔
کچھ صارفین نے 2006 کے ورلڈ کپ کی تصاویر کے ساتھ موجودہ پرفارمنس کا موازنہ کرتے ہوئے بھی شکوک کا اظہار کیا، لیکن وہ یہ بھول گئے کہ ان دونوں تصاویر کے درمیان تقریباً دو دہائیوں کا طویل وقفہ ہے۔
حقیقت کا پردہ فاش
تاہم، جس تیزی سے یہ افواہ پھیلی، اسی تیزی سے اسے غلط بھی ثابت کر دیا گیا۔ مداحوں اور صحافیوں نے شکیہ کے میکسیکو میں موجود ہونے کے ناقابل تردید ثبوت پیش کر دیے۔ سب سے اہم ثبوت گلوکارہ کی پیشانی پر موجود ایک مخصوص نشان (داغ) تھا، جو اسٹیج پر بھی صاف نظر آ رہا تھا۔ اس کے علاوہ، ان کے قد کو بڑھانے کے لیے پہنی جانے والی پلیٹ فارم جوتے بھی ان کی شناخت کی تصدیق کر رہے تھے، کیونکہ شکیہ کا قد محض 1.57 میٹر ہے۔
مزید برآں، پرفارمنس کے فوراً بعد کی ویڈیوز میں شکیہ کو اسٹیج کے پیچھے رقص کرتے ہوئے دیکھا گیا۔ ڈی اسپورٹس کے ایک صحافی کے ساتھ میچ سے ایک رات پہلے لی گئی سیلفی اور دیگر مشہور شخصیات کے ساتھ تصاویر نے بھی اس بات کی تصدیق کی کہ وہ خود وہاں موجود تھیں۔
شکیہ کی انسٹاگرام سرگرمیوں نے بند کیا بحث کا دروازہ
شکیہ کے آفیشل انسٹاگرام اکاؤنٹ پر ایک نظر ڈالنا ہی اس پوری بحث کو ختم کرنے کے لیے کافی تھا۔ گلوکارہ نے نائجیرین اسٹار برنا بوائے کے ساتھ اسٹیج کے پیچھے کی متعدد تصاویر اور اسٹوریز شیئر کیں، جن کے ساتھ انہوں نے ’دائی، دائی‘ گانا ریکارڈ کیا ہے۔ اس کے علاوہ، انہوں نے اپنے ہم وطن گلوکار جے بالون اور افتتاحی تقریب میں پرفارم کرنے والے دیگر فنکاروں کے ساتھ بھی تصاویر پوسٹ کیں۔ ان تمام ثبوتوں نے ’جعلی شکیہ‘ کی افواہ کا مکمل طور پر خاتمہ کر دیا۔