# یوم دفاع: پاکستان کی مسلح افواج کا شہداء کو خراج عقیدت، دشمن کے لیے واضح پیغام
راولپنڈی (ویب ڈیسک) — پاکستان کی مسلح افواج نے 61 ویں یوم دفاع و شہداء کے موقع پر شہداء کو خراج عقیدت پیش کرتے ہوئے غازیوں اور شہداء کے اہل خانہ سے گہری محبت اور احترام کا اظہار کیا ہے۔ اس موقع پر ملکی قیادت نے قوم سے اپنے عزم کا اعادہ کیا کہ وطن عزیز کی حفاظت کسی بھی صورت میں کمزور نہیں پڑنے دی جائے گی۔
اعلیٰ فوجی قیادت کا مشترکہ پیغام
چیف آف آرمی اسٹاف اور چیف آف ڈیفنس فورسز جنرل سید عاصم منیر، چیف آف نیول اسٹاف ایڈمرل نوید اشرف، چیف آف ایئر اسٹاف ایئر چیف مارشل ظہیر احمد بابر سدھو اور کمانڈر نیشنل اسٹریٹجک کمانڈ جنرل سید عامر رضا نے مشترکہ طور پر شہداء کو خراج عقیدت پیش کیا۔ پاک فوج کے شعبہ تعلقات عامہ (آئی ایس پی آر) کی جانب سے جاری بیان میں کہا گیا کہ 6 ستمبر قومی اتحاد، بہادری اور عزم کی پائیدار علامت ہے، جو ہمیں یاد دلاتا ہے کہ 1965 کی جنگ کے دوران پاکستانی قوم نے مادر وطن کے دفاع کے لیے یکجہتی کا مظاہرہ کیا۔
شہداء کی لازوال قربانیاں
آئی ایس پی آر کے مطابق پاکستان کے شہداء غیرت، فرض اور قربانی کے اعلیٰ ترین رولز کے علمبردار ہیں۔ میدان جنگ، فضا اور سمندروں میں پاکستان کے محافظوں کی نسلوں نے قوم کی خدمت میں انتہائی قربانیاں دیں۔ بیان میں کہا گیا کہ شہداء کا لازوال ورثہ آنے والی نسلوں کو متاثر کرتا رہے گا، جبکہ شہداء کے اہل خانہ حوصلہ اور استقامت کی علامت ہیں۔
فوجی میڈیا ونگ نے مزید کہا کہ ہم اپنے غازیوں کو بھی سلام پیش کرتے ہیں جو بہادری اور مستقل مزاجی کے ساتھ ملک کی سرحدوں کی حفاظت کر رہے ہیں۔
دشمن کے لیے واضح پیغام
آئی ایس پی آر کے بیان میں کہا گیا کہ پاکستان کی مسلح افواج ملکی خودمختاری، علاقائی سالمیت اور قومی مفادات کے دفاع کے لیے مکمل طور پر تیار ہیں۔ پاکستان خطے میں امن، استحکام اور خوشحالی کا خواہاں ہے اور ذمہ دارانہ رویے اور پرامن بقائے باہمی کے لیے پرعزم ہے۔ تاہم، اس عزم کو کبھی کمزوری نہیں سمجھا جانا چاہیے۔ پاکستان کے خلاف کسی بھی جارحیت کا پُرزور اور فیصلہ کن جواب دیا جائے گا۔
عزم کی تجدید
یوم دفاع و شہداء کے موقع پر مسلح افواج نے پاکستان اور اس کے عوام سے اپنی غیر متزلزل وفاداری کا عہد کیا ہے۔ آئی ایس پی آر نے کہا کہ شہداء کی اعلیٰ قربانیاں، غازیوں کا جذبہ اور ان کے اہل خانہ کی استقامت ہمیشہ قومی طاقت اور فخر کا ذریعہ رہے گی۔ قوم کے ساتھ متحد ہو کر مسلح افواج عزت، پیشہ ورانہ مہارت اور غیر متزلزل عزم کے ساتھ اپنی مقدس ذمہ داریاں نبھاتی رہیں گی۔
