لاہور: صوبائی ڈیزاسٹر مینجمنٹ اتھارٹی (پی ڈی ایم اے) پنجاب نے صوبے بھر میں الرٹ جاری کرتے ہوئے خبردار کیا ہے کہ مون سون بارشوں کا نواں اور آخری سلسلہ آج سے 17 ستمبر تک متعدد اضلاع کو متاثر کر سکتا ہے۔
پی ڈی ایم اے کے ترجمان کے مطابق ہفتے کے روز راولپنڈی، جہلم، چکوال، تلا گنگ اور اٹک میں بارش کا امکان ہے، جبکہ لاہور میں موسم گرم اور خشک رہنے کا امکان ہے جہاں درجہ حرارت 27 سے 36 ڈگری سینٹی گریڈ کے درمیان رہ سکتا ہے۔
اتوار سے 17 ستمبر تک بارشوں کی پیش گوئی
اتوار سے 17 ستمبر تک لاہور، سیالکوٹ، شیخوپورہ، نارووال، منڈی بہاؤالدین، گوجرانوالہ، گجرات، وزیرآباد، حافظ آباد، قصور، اوکاڑہ، ننکانہ صاحب اور سرگودھا میں بارش متوقع ہے۔
اسی طرح خوشاب، میانوالی، نورپور تھل، فیصل آباد، جھنگ، ٹوبہ ٹیک سنگھ، لیہ، بھکر، ساہیوال، ڈیرہ غازی خان، ملتان اور گرد و نواح میں بھی بارش کی پیش گوئی کی گئی ہے۔
پہاڑی علاقوں میں لینڈ سلائیڈنگ کا خدشہ
پی ڈی ایم اے کے ڈائریکٹر جنرل سیف انور جپہ نے مری، گلیات اور دیگر پہاڑی علاقوں میں لینڈ سلائیڈنگ کے ممکنہ خطرے سے خبردار کیا ہے اور کمشنرز اور ڈپٹی کمشنرز کو ہدایت کی ہے کہ وہ ہائی الرٹ رہیں۔
پی ڈی ایم اے سربراہ نے بڑے شہروں خصوصاً راولپنڈی، لاہور، گوجرانوالہ اور فیصل آباد میں شہری سیلاب کے خطرے سے بھی آگاہ کیا۔ ان کے مطابق بارانی ندی نالوں میں بھی طغیانی کا امکان ہے۔
متعلقہ محکمے ہائی الرٹ پر
کسی بھی ہنگامی صورتحال سے نمٹنے کے لیے صحت، آبپاشی، مواصلات و تعمیرات، لوکل گورنمنٹ اور لائیو اسٹاک سمیت متعلقہ محکموں کو الرٹ کر دیا گیا ہے۔
شہریوں کے لیے احتیاطی ہدایات
پی ڈی ایم اے نے شہریوں کو ہدایت کی ہے کہ وہ خراب موسم کے دوران احتیاطی تدابیر اختیار کریں۔
- کمزور اور خستہ حال عمارتوں میں رہنے سے گریز کریں۔
- گرج چمک اور تیز آندھی کے دوران غیر ضروری سفر نہ کریں۔
- بجلی گرنے کے دوران محفوظ مقامات پر پناہ لیں۔
- بچوں کو نشیبی علاقوں، کھڑے پانی اور بجلی کے کھمبوں سے دور رکھیں۔
