لاہور: پنجاب کے کاؤنٹر ٹیررازم ڈیپارٹمنٹ (سی ٹی ڈی) نے صوبے بھر میں 98 انٹیلیجنس بیسڈ آپریشنز کے دوران 13 دہشت گردوں کو گرفتار کر لیا۔ سی ٹی ڈی کے ترجمان کے مطابق گرفتار ملزمان کے قبضے سے بارودی مواد، ایک دستی بم، تین آئی ای ڈی، 12 ڈیٹونیٹرز اور 35 فٹ فیوز وائر برآمد ہوئے۔
پاکپتن سے را سے منسلک دہشت گرد گرفتار
ترجمان نے بتایا کہ را سے منسلک ایک مشتبہ دہشت گرد وجید کو پاکپتن سے گرفتار کیا گیا۔ گرفتار ملزمان میں عثمان، نعیم، عبدالمنان، وجید، اسامہ، عثمان، حسن اور بابر شامل ہیں۔
سی ٹی ڈی کے مطابق گرفتار دہشت گردوں کے خلاف 13 مقدمات درج کر لیے گئے ہیں۔
1595 کمبنگ آپریشنز، 52 مشتبہ افراد گرفتار
رواں ہفتے کے دوران سی ٹی ڈی نے دیگر قانون نافذ کرنے والے اداروں کے تعاون سے پنجاب بھر میں 1595 کمبنگ آپریشنز بھی کیے۔ ان آپریشنز میں مجموعی طور پر 55,416 افراد کی جانچ پڑتال کی گئی، جس کے نتیجے میں 52 مشتبہ افراد کو گرفتار کیا گیا۔
ترجمان نے کہا کہ سی ٹی ڈی محفوظ پنجاب کے لیے اپنی کارروائیاں جاری رکھے ہوئے ہے۔
