میدان ورڈک: افغانستان میں کابل-قندھار ہائی وے پر خوفناک ٹریفک حادثے کے نتیجے میں کم از کم 25 افراد جاں بحق اور 27 زخمی ہو گئے۔ یہ المناک واقعہ بدھ کو پیش آیا جس کی تصدیق حکام نے کی ہے۔
افغان وزارت داخلہ کے ترجمان عبدالمتین قانی کے مطابق یہ حادثہ ڈرائیور کی لاپرواہی کے باعث پیش آیا، جس کے نتیجے میں مسافروں سے بھری بس الٹ گئی۔ یہ حادثہ کابل کے قریب معیدان ورڈک صوبے کی حدود میں پیش آیا۔
قانی نے کہا کہ زخمیوں کو مقامی اسپتالوں میں منتقل کیا گیا ہے جہاں ان کا علاج جاری ہے، البتہ زخمیوں کی حالت کے بارے میں تفصیلات فراہم نہیں کی گئیں۔
افغانستان میں ٹریفک حادثات کا رونما ہونا عام بات ہے، جس کی وجوہات میں خراب سڑکیں، بے ضابطہ ڈرائیونگ اور طویل عرصے تک جاری رہنے والی جنگ شامل ہیں۔ گزشتہ ہفتے ہی مغربی ہرات صوبے میں ایران سے واپس آنے والے مہاجرین کی بس ایک موٹر سائیکل اور ٹرک سے ٹکرا گئی تھی، جس کے نتیجے میں 78 افراد جاں بحق ہوئے تھے، جن میں درجنوں بچے بھی شامل تھے۔
گزشتہ دسمبر میں بھی دو مختلف حادثات میں 52 افراد ہلاک ہوئے تھے جب دو بسوں میں ایندھن کے ٹینکر کے تصادم سے حادثہ پیش آیا تھا۔
افغانستان میں سڑکوں کی حالت زار اور ٹریفک قوانین کی کمی کے باعث ایسے حادثات تشویش ناک سطح پر بڑھ رہے ہیں، جس کے سدباب کے لیے فوری اقدامات کی ضرورت محسوس کی جارہی ہے۔
