بھارتی میڈیا کی رپورٹس کے مطابق بھارت نے بنگلا دیش کے ساتھ ہونے والی کرکٹ سیریز کو ملتوی کرنے کا فیصلہ کیا ہے۔ اس فیصلے کی بنیادی وجہ دونوں ممالک کے درمیان بڑھتا ہوا سیاسی تناؤ بتایا گیا ہے۔ بھارتی حکومت نے بھارت کرکٹ بورڈ کو ہدایت کی ہے کہ وہ یہ دورہ ملتوی کر دے۔ اس کے نتیجے میں بنگلا دیش کرکٹ بورڈ نے بھی بھارتی ٹیم کے خلاف سیریز کے میڈیا رائٹس کی فروخت روک دی ہے۔
اطلاعات کے مطابق بھارتی براڈکاسٹرز کو بھی اس بات سے آگاہ کر دیا گیا ہے کہ یہ سیریز اب نہیں ہوگی۔ بنگلا دیش کرکٹ بورڈ کے ایک اہلکار کے مطابق ابھی تک سیریز کی تاریخوں کو فائنل نہیں کیا گیا تھا، جبکہ بھارتی کرکٹ بورڈ بی سی سی آئی نے اگست میں دورہ کرنے کو مشکل قرار دیا ہے۔
یہ سیریز 3 ون ڈے اور 3 ٹی ٹوئنٹی میچز پر مشتمل تھی، جو 17 اگست سے 31 اگست تک شیڈول کی گئی تھی۔ بھارتی میڈیا کی اطلاعات کے مطابق دورے کے ملتوی ہونے کا باضابطہ اعلان جلد کیا جائے گا۔
