کراچی کے علاقے لیاری میں واقع بغدادی میں جمعہ کی صبح ایک 5 منزلہ عمارت زمین بوس ہوگئی، جس کے نتیجے میں 4 افراد جاں بحق اور متعدد زخمی ہوگئے ہیں۔ ریسکیو حکام کے مطابق، عمارت کے ملبے سے 6 افراد کو زخمی حالت میں نکالا گیا جبکہ 4 افراد کی لاشیں برآمد ہوئیں۔ مزید افراد کے ملبے تلے دبے ہونے کا خدشہ ظاہر کیا جا رہا ہے۔
ریسکیو ٹیموں نے فوری طور پر کارروائیاں شروع کر دی ہیں، تاہم راستوں کی بندش کی وجہ سے ہیوی مشینری کے پہنچنے میں تاخیر ہوئی۔ متاثرہ عمارت میں 6 خاندان مقیم تھے اور ریسکیو حکام مزید افراد کو نکالنے کی کوشش کر رہے ہیں۔ عمارت کے ساتھ جڑی 2 اور 7 منزلہ عمارتوں کو بھی خالی کروا لیا گیا ہے جبکہ متاثرہ عمارت کی بجلی اور گیس کی لائنیں کاٹ دی گئی ہیں۔
ایس بی سی اے کے ذرائع کا کہنا ہے کہ یہ عمارت 30 برس پرانی اور بوسیدہ تھی، جسے مخدوش قرار دیا گیا تھا، مگر علاقہ مکینوں کے مطابق کوئی نوٹس جاری نہیں ہوا تھا۔ ایس بی سی اے نے شہر میں 578 مخدوش عمارتوں کی موجودگی کی تصدیق کی ہے، جن میں سے زیادہ تر ضلع جنوبی میں واقع ہیں۔
وزیراعلیٰ سندھ مراد علی شاہ نے واقعے کا نوٹس لیتے ہوئے بلڈنگ کنٹرول اتھارٹی سے فوری رپورٹ طلب کرلی ہے۔ انہوں نے بوسیدہ عمارتوں کی تفصیلات فراہم کرنے کی ہدایت کی اور کہا کہ انسانی جانوں کا تحفظ اولین ترجیح ہے۔ گورنر سندھ نے بھی واقعے پر تشویش کا اظہار کرتے ہوئے زخمیوں کو فوری طبی امداد فراہم کرنے کی ہدایت کی ہے۔
علاوہ ازیں، عمارت گرنے کے واقعے کی تحقیقات کے لیے ایک اعلیٰ سطح کی کمیٹی قائم کردی گئی ہے، جو تین دن کے اندر ذمہ دار افسران کی نشاندہی کرے گی۔ وزیر بلدیات نے سندھ بلڈنگ کنٹرول اتھارٹی کے متعلقہ افسران کو معطل کرنے کے احکامات بھی جاری کیے ہیں۔
