لاہور: وزیراعلیٰ پنجاب مریم نواز شریف نے یوم استحصال کے موقع پر کشمیری عوام کے ساتھ غیر متزلزل یکجہتی کا اعادہ کرتے ہوئے کہا ہے کہ 5 اگست 2019 واقعات کشمیریوں کی شناخت، حقوق اور مستقبل پر حملہ تھے جسے پاکستان کبھی قبول نہیں کرے گا۔ انہوں نے عالمی برادری سے مطالبہ کیا کہ بھارتی غیر قانونی طور پر مقبوضہ جموں و کشمیر میں انسانی حقوق کی سنگین خلاف ورزیوں کا فوری نوٹس لیا جائے۔
شہدا کو خراج عقیدت اور حق خودارادیت کی حمایت
اپنے ایک پیغام میں وزیراعلیٰ پنجاب نے آزادی کی جدوجہد میں جانوں کا نذرانہ پیش کرنے والے شہدا کو خراج عقیدت پیش کیا اور ان کے اہل خانہ کے صبر و استقامت کو سلام کیا۔ انہوں نے کہا کہ پاکستانی عوام اپنے کشمیری بھائیوں اور بہنوں کے شانہ بشانہ کھڑے ہیں اور حق خودارادیت کی طویل جدوجہد میں سیاسی، سفارتی اور اخلاقی حمایت جاری رکھیں گے۔
عالمی برادری سے کردار ادا کرنے کاالبہ
مریم نواز نے اقوام متحدہ، بین الاقوامی انسانی حقوق کی تنظیموں اور عالمی برادری پر زور دیا کہ وہ بھارتی غیر قانونی طور پر مقبوضہ جموں و کشمیر میں مبینہ طور پر انسانی حقوق کی سنگین خلاف ورزیوں کا فوری نوٹس لیں اور خطے کے لوگوں کو ان کے بنیادی حقوق کی فراہمی کو یقینی بنانے کے لیے مؤثر کردار ادا کریں۔
نواز شریف کا اصولی مؤقف اور قومی عزم
>وزیراعلیٰ پنجاب نے کہا کہ پاکستان مسلم لیگ (ن) کے صدر محمد نواز شریف نے مسئلہ کشمیر پر ہمیشہ واضح اور اصولی مؤقف برقرار رکھا ہے۔ انہوں نے مزید کہا کہ پاکستان اپنے قومی مؤقف کے مطابق کشمیری عوام کے حق خودارادیت کی حمایت جاری رکھے گا۔
انہوں نے اس عزم کا اعادہ کیا کہ پاکستانی عوام اپنے کشمیری بھائیوں اور بہنوں کے ساتھ کھڑی ہے اور ہر سطح پر ان کی جائز جدوجہد کی حمایت جاری رکھے گی۔
