اسلام آباد: نیشنل ڈیزاسٹر مینجمنٹ اتھارٹی (این ڈی ایم اے) نے ملک کے بیشتر حصوں میں اگلے 12 سے 24 گھنٹوں کے دوران طوفانی بارشوں، تیز ہواؤں اور گرج چمک کی پیشگوئی کرتے ہوئے ملک گیر موسمی الرٹ جاری کر دیا ہے۔ اتھارٹی نے خبردار کیا ہے کہ کمزور اور پہاڑی علاقوں میں شہری سیلاب، فلیش فلڈز، لینڈ سلائیڈنگ اور گلیشیئر لیک آؤٹ برسٹ فلڈ (گلوف) کے واقعات رونما ہو سکتے ہیں۔
موسمیاتی پیشگوئی اور ممکنہ خطرات
نیشنل ایمرجنسی آپریشن سینٹر (این ای او سی) کے مطابق یہ موسمیاتی صورتحال تین سے چار ماہ قبل جاری کردہ موسمی آؤٹ لک کے عین مطابق ہے۔ این ڈی ایم اے نے متعلقہ وفاقی، صوبائی اور ضلعی حکام کو مسلسل پیشگی وارننگز اور خطرات کی تشخیص فراہم کرنے کا سلسلہ جاری رکھا ہوا ہے تاکہ کسی بھی ممکنہ ہنگامی صورتحال سے بروقت اور مؤثر طریقے سے نمٹا جا سکے۔
کن علاقوں میں بارش کا امکان ہے؟
الرٹ کے مطابق ملک کے بیشتر حصوں میں بارش کے ساتھ گرج چمک، آندھی اور گرد آلود ہوائیں چلنے کا امکان ہے۔
- پنجاب اور اسلام آباد: راولپنڈی، مری، اٹک، چکوال، تلہ گنگ، منڈی بہاؤالدین، سرگودھا، گوجر خان، گجرات، جہلم، سیالکوٹ، گوجرانوالہ، حافظ آباد، لاہور، فیصل آباد، خوشاب، جھنگ، میانوالی، ڈیرہ غازی خان، قصور، اوکاڑہ، ساہیوال، ملتان، بہاولپور اور رحیم یار خان میں بارش متوقع ہے۔
- گلگت بلتستان اور آزاد جموں و کشمیر: گلگت، سکردو، دیامر، استور، غذر، ہنزہ، گانچھے، شگر، وادی نیلم، مظفر آباد، راولاکوٹ، باغ، کوٹلی، پونچھ، ہٹیاں، میرپور اور بھمبر میں گرج چمک کے ساتھ بارش کا امکان ہے۔
- خیبر پختونخوا: چترال، دیر، سوات، بٹگرام، مانسہرہ، ایبٹ آباد، ہری پور، صوابی، مردان، چارسدہ، پشاور، کوہاٹ، پاراچنار، کرک، بنوں، ڈیرہ اسماعیل خان اور وزیرستان میں بارش اور گرج چمک کا الرٹ جاری کیا گیا ہے۔
- بلوچستان اور سندھ: تربت، کیچ، آواران، خضدار اور ژوب میں گرج چمک کے ساتھ بار جبکہ جیکب آباد، سکھر، لاڑکانہ، خیرپور، دادو، گھوٹکی، کشمور، شکارپور، شہید بینظیر آباد اور کراچی میں تیز ہوائیں، گرد آلود طوفان اور چند مقامات پر بارش کا امکان ہے۔
گلیشیئر لیک آؤٹ برسٹ فلڈ کا خصوصی الرٹ
این ڈی ایم اے نے گلگت بلتستان، خیبر پختونخوا اور آزاد کشمیر میں گلیشیئر لیک آؤٹ برسٹ فلڈ (گلوف) کے خطرے کے حوالے سے علیحدہ الرٹ بھی جاری کیا ہے۔ حکام نے خبردار کیا ہے کہ گلوف کے واقعات کمزور پہاڑی علاقوں میں اچانک سیلاب، لینڈ سلائیڈنگ اور ملبے کے بہاؤ کا سبب بن سکتے ہیں۔
انتظامیہ اور شہریوں کے لیے ہدایات
این ڈی ایم اے کے مطابق ضلعی انتظامیہ اور متعلقہ ادارے کمزور علاقوں کی مسلسل نگرانی کر رہے ہیں اور انہیں ہائی الرٹ رہنے کی ہدایت کی گئی ہے۔ امدادی اور ہنگامی رسپانس ٹیموں کو بھی کسی بھی صورت حال کے لیے تیار رہنے کی ہدایت کی گئی ہے۔
سیاحوں اور مسافروں کو مشورہ دیا گیا ہے کہ وہ شدید بارش کے دوران غیر ضروری سفر سے گریز کریں اور شمالی علاقوں کا سفر کرنے سے پہلے موسمی پیشگوئی اور سڑکوں کی صورتحال ضرور چیک کریں، کیونکہ سیلاب، لینڈ سلائیڈنگ اور ملبے کے بہاؤ کی وجہ سے سڑکیں بند ہونے کا امکان موجود ہے۔
شہریوں سے اپیل کی گئی ہے کہ وہ “پاک این ڈی ایم اے ڈیزاسٹر الرٹ” موبائل ایپلیکیشن کے ذریعے اپ ڈیٹ رہیں اور کسی بھی ہنگامی صورتحال میں فوری طور پر مقامی انتظامیہ اور ریسکیو سروسز سے رابطہ کریں۔
