یوم استحصال: پاکستان کا کشمیریوں سے اظہار یکجہتی، بھارت پر انسانی حقوق کی پامالیوں کے خاتمے کا مطالبہ

اسلام آباد: صدر آصف علی زرداری اور وزیراعظم شہباز شریف نے یوم استحصال کشمیر کے موقع پر بھارت کے غیر قانونی طور پر مقبوضہ جموں و کشمیر کے عوام کے ساتھ غیر متزلزل یکجہتی کا اعادہ کرتے ہوئے ان کی ہمت، استقامت اور حق خودارادیت کے لیے جاری جدوجہد کو خراج تحسین پیش کیا ہے۔ دونوں رہنماؤں نے عالمی برادری سے مطالبہ کیا کہ وہ بھارت پر دباؤ ڈالے کہ وہ مقبوضہ وادی میں انسانی حقوق کی سنگین خلاف ورزیاں بند کرے۔

صدر مملکت کا پیغام: کشمیری عوام کی قربانیاں رائیگاں نہیں جائیں گی

صدر آصف علی زرداری نے اپنے بیان میں کہا کہ لاکھوں کشمیری بدستور شدید پابندیوں کے تحت زندگی بسر کر رہے ہیں جس نے روزمرہ زندگی کے ہر پہلو کو متاثر کیا ہے۔ انہوں نے کہا، “خاندانوں نے غیر یقینی کی صورتحال برداشت کی، نوجوانوں نے اپنے مواقع سکڑتے دیکھے پوری برادریوں نے طویل تنازعے اور عدم استحکام کا بوجھ اٹھایا۔”

انہوں نے زور دے کر کہا کہ ان تمام تر مشکلات کے باوجود جموں و کشمیر کے عوام انصاف کے حصول اور اپنے جائز حق کے لیے ثابت قدم ہیں۔ صدر نے واضح کیا کہ پاکستان مقبوضہ کشمیر کے عوام کی اخلاقی، سیاسی اور سفارتی حمایت جاری رکھے گا۔ ان کا کہنا تھا، “ہم ہر بین الاقوامی فورم پر اس وقت تک آواز اٹھاتے رہیں گے جب تک کشمیر کا مسئلہ اقوام متحدہ کی سلامتی کونسل کی متعلقہ قراردادوں اور کشمیری عوام کی امنگوں کے مطابق حل نہیں ہو جاتا۔”