لاہور: پاکستان کرکٹ بورڈ (پی سی بی) نے آئی سی سی ویمنز ٹی ٹوئنٹی ورلڈ کپ 2026 کے لیے 15 رکنی سکواڈ کا اعلان کر دیا ہے، جس میں فاطمہ ثنا کو کپتان برقرار رکھا گیا ہے۔ یہی سکواڈ آئرلینڈ میں ہونے والی سہ فریقی سیریز میں بھی شرکت کرے گا۔ پانچ کھلاڑی ایسی ہیں جو پہلی بار اس عالمی ٹورنامنٹ میں اپنے جوہر دکھائیں گی۔
ورلڈ کپ کی تیاریوں کا آغاز
انگلینڈ اور ویلز میں 12 جون سے 5 جولائی تک ہونے والے ورلڈ کپ سے قبل پاکستانی ٹیم 28 مئی سے 4 جون تک ڈبلن میں میزبان آئرلینڈ اور ویسٹ انڈیز کے ساتھ سہ فریقی سیریز کھیلے گی۔ اس ایونٹ میں پاکستان کو چار میچز کھیلنے کا موقع ملے گا۔
قومی ٹیم نے حال ہی میں کراچی میں زمبابوے کے خلاف ٹی ٹوئنٹی سیریز میں 0-3 سے کلین سویپ کیا تھا۔ پی سی بی کے مطابق اس سیریز نے کھلاڑیوں کو اپنی صلاحیتیں نکھارنے اور آئندہ ٹورنامنٹس کے لیے تیاری کا بہترین موقع فراہم کیا۔
نئے چہرے اور تجربہ کار قیادت
منتخب سکواڈ میں ایمن فاطمہ، نتالیہ پرویز، رامین شمیم، سائرہ جبین اور تسلیمہ رباب وہ پانچ کھلاڑی ہیں جو پہلی بار ٹی ٹوئنٹی ورلڈ کپ کھیلیں گی۔ 24 سالہ فاطمہ ثنا اپنا تیسرا ورلڈ کپ کھیل رہی ہیں اور مسلسل دوسری بار ٹیم کی قیادت کریں گی، اس سے قبل انہوں نے 2024 میں یو اے ای میں ہونے والے ٹورنامنٹ میں بھی کپتانی کے فرائض انجام دیے تھے۔
پاکستان کے وارم اپ اور گروپ میچز
ورلڈ کپ سے قبل پاکستان ڈربی میں دو وارم اپ میچ کھیلے گا، جہاں اس کا مقابلہ 6 جون کو سری لنکا اور 9 جون کو سکاٹ لینڈ سے ہوگا۔ پاکستان اپنی مہم کا آغاز 14 جون کو برمنگھم کے ایجبسٹن گراؤنڈ میں بھارت کے خلاف کرے گا، جبکہ 17 جون کو اسی گراؤنڈ پر جنوبی افریقہ سے مقابلہ ہوگا۔
- 20 جون: بنگلہ دیش بمقابلہ پاکستان، ہیمپشائر باؤل، ساؤتھمپٹن
- 23 جون: آسٹریلیا بمقابلہ پاکستان، ہیڈنگلے، لیڈز
- 27 جون: نیدرلینڈز بمقابلہ پاکستان، برسٹل کاؤنٹی گراؤنڈ، برسٹل
ہر گروپ سے ٹاپ دو ٹیمیں سیمی فائنل کے لیے کوالیفائی کریں گی، جو 30 جون اور 2 جولائی کو شیڈول ہیں، جبکہ فائنل 5 جولائی کو لندن کے لارڈز کرکٹ گراؤنڈ میں کھیلا جائے گا۔
انتظامیہ اور معاون اسٹاف
وقار ریاض کو ٹیم کا مینٹور اور ہیڈ کوچ نامزد کیا گیا ہے، جبکہ عائشہ اشعر مینیجر کے طور پر خدمات انجام دیں گی۔ معاون اسٹاف میں عبدالرحمن (اسپن بولنگ کوچ)، عمید آصف (فاسٹ بولنگ کوچ)، عبدالمجید (فیلڈنگ کوچ) اور عمران فرحت (بیٹنگ کوچ) شامل ہیں۔
پاکستان سکواڈ: فاطمہ ثنا (کپتان)، عالیہ ریاض، عائشہ ظفر، ڈیانا بیگ، ایمن فاطمہ، گل فیروزہ، ارم جاوید، منیبہ علی صدیقی (وکٹ کیپر)، نشرہ سندھو، نتالیہ پرویز، رامین شمیم، سعدیہ اقبال، سائرہ جبین، تسلیمہ رباب اور طوبیٰ حسن۔
ریزرو کھلاڑی: امبر کنیت، مومنہ ریاست، سدف شمس، سدرہ امین، سیدہ عروب شاہ اور ام ہانی۔
