پاکستان کرکٹ بورڈ کے چیئرمین کی شرکت کا حتمی فیصلہ وزیراعظم شہباز شریف کریں گے، ذرائع
لاہور: پاکستان کرکٹ بورڈ (پی سی بی) کے چیئرمین محسن نقوی کو رواں ماہ کے آخر میں احمد آباد میں ہونے والے انٹرنیشنل کرکٹ کونسل (آئی سی سی) کے بورڈ اجلاس اور انڈین پریمیئر لیگ (آئی پی ایل) 2026 کے فائنل میں شرکت کی دعوت موصول ہوئی ہے۔ ذرائع نے ہفتے کے روز جیو نیوز کو بتایا کہ یہ دعوت نامہ وزیراعظم شہباز شریف کو بھجوا دیا گیا ہے اور وہی ان کے سرحد پار جانے کے حوالے سے فیصلہریں گے۔
ایک بین الاقوامی کرکٹ نیوز ویب سائٹ کی رپورٹ کے مطابق، آئی سی سی رواں ماہ اجلاسوں کا ایک سلسلہ منعقد کرنے جا رہی ہے، جس میں چیف ایگزیکٹوز کمیٹی (سی ای سی) اور بورڈ میٹنگز شامل ہیں۔ ان ملاقاتوں میں ورلڈ ٹیسٹ چیمپئن شپ (ڈبلیو ٹی سی) کے مستقبل پر بات چیت دوبارہ شروع کی جائے گی۔
رپورٹ میں بتایا گیا ہے کہ سی ای سی کا اجلاس 21 مئی کو بذریعہ ویڈیو لنک ہوگا، جبکہ بورڈ کا براہِ راست اجلاس 30 اور 31 مئی کو احمد آباد میں شیڈول ہے۔ اسی دوران 31 مئی کو نریندر مودی اسٹیڈیم میں آئی پی ایل 2026 کا فائنل بھی کھیلا جائے گا۔
رپورٹ میں یہ بھی کہا گیا کہ محسن نقوی سے توقع کی جا رہی تھی کہ وہ ذاتی طور پر اجلاس میں شریک ہوں گے، تاہم دونوں ممالک کی حکومتوں اور ان کے کرکٹ بورڈز کے درمیان کشیدہ تعلقات نے ان کی شرکت پر شکوک و شبہات پیدا کر دیے تھے۔
ذرائع نے دعویٰ کیا ہے کہ پی سی بی چیئرمین کو بورڈ میٹنگ اور آئی پی ایل فائنل دونوں میں شرکت کی دعوت دی گئی ہے۔ اس کے بعد پی سی بی سربراہ نے یہ دعوت نامہ وزیراعظم شہباز شریف کو بھجوا دیا ہے، جو اس بات کا فیصلہ کریں گے کہ آیا وہ اجلاس اور آئی پی ایل 2026 کے فائنل میں شرکت کے لیے سرحد پار جائیں گے یا نہیں۔
یہ بات قابل ذکر ہے کہ آئی سی سی کے سہ ماہی اجلاسوں کا حصہ ہونے والی یہ ملاقاتیں اصل میں مارچ اپریل میں دوحہ، قطر میں طے تھیں، لیکن خطے میں کشیدگی کے باعث انہیں ملتوی کرنا پڑا تھا۔
