اسلام آباد: وفاقی آئینی عدالت میں سہیل آفریدی، بابر سلیم سواتی اور قومی اسمبلی کے رکن جنید اکبر خان کی بازیابی کے لیے آئینی درخواست دائر کر دی گئی ہے۔
یہ درخواست رکن قومی اسمبلی شندنا گلزار نے آئین کے آرٹیکل 175E(3) کے تحت دائر کی ہے، جس میں وزارت داخلہ، چیف سیکرٹری خیبر پختونخوا اور انسپکٹر جنرل پولیس (آئی جی پی) خیبر پختونخوا کو فریق بنایا گیا ہے۔
آئینی دفعات کے دائرہ اختیار پر سوال
درخواست میں آئین کے آرٹیکلز 232، 234 اور 245 کے تحت استعمال کیے جانے والے اختیارات کی آئینی حدود سے متعلق اہم سوالات اٹھائے گئے ہیں۔ درخواست گزار کی جانب سے موقف اختیار کیا گیا ہے کہ ان آئینی دفعات میں سے کوئی بھی کسی فرد کی غیر قانونی حراست کی اجازت نہیں دیتا۔
عدالت سے مطالبہ
درخواست گزار نے عدالت سے استدعا کی ہے کہ حکام کو سہیل آفریدی، بابر سلیم سواتی اور جنید اکبر خان کو عدالت کے سامنے پیش کرنے کا حکم دیا جائے۔ انہوں نے متعلقہ حکام کو ہدایت دینے کی بھی درخواست کی ہے کہ وہ تینوں رہنماؤں کی موجودہ جگہ اور ان کی حراست کی وجوہات فوری طور پر ظاہر کریں۔
درخواست میں مزید عدالتی احکامات کی استدعا کی گئی ہے تاکہ تینوں رہنماؤں کو ان کے وکلاء اور اہل خانہ تک رسائی، طبی سہولیات کی فراہمی اور تشدد سے تحفظ کو یقینی بنایا جائے۔
سیاسی مقاصد کیلئے اقدامات کو اختیارات کا ناجائز استعمال قرار دیا
درخواست گزار نے استدلال کیا ہے کہ سیاسی مقاصد کے لیے کیے گئے اقدامات اختیارات کا ناجائز استعمال اور بنیادی حقوق کی خلاف ورزی ہیں۔
انہوں نے عدالت پر زور دیا ہے کہ وہ اس معاملے کا نوٹس لیں اور متعلقہ حکام کو ہدایت دیں کہ تمام اقدامات قانون کے مطابق کیے جائیں۔
