آگ سے بچاؤ کے مشقیں، عملے کی تربیت اور تخلیہ کے منصوبے لازمی قرار
کراچی: گل پلازہ میں تباہ کن آگ کے واقعے کے بعد سندھ کے محکمہ تعلیم نے صوبے بھر کے پرائیویٹ اسکولوں کے لیے آگ سے بچاؤ کی نئی حفاظتی ہدایات جاری کر دی ہیں۔
اسکول ایجوکیشن ڈیپارٹمنٹ کی جانب سے جاری نوٹیفکیشن میں تمام پرائیویٹ تعلیمی اداروں کو فوری طور پر ان ہدایات پر عمل درآمد کا حکم دیا گیا ہے۔
حفاظتی اقدامات کی تفصیلات
نئی ہدایات کے تحت اسکولوں میں درج ذیل اقدامات لازمی قرار دیے گئے ہیں:
- آگ کے الارم، سموک ڈیٹیکٹرز اور آگ بجھانے کے آلات کی تنصیب
- ہنگامی راستوں اور سیڑھیوں کو کھلا اور واضح نشان زد رکھنا
- بجلی کے نظام کا باقاعدہ معائنہ
- ہنگامی تخلیہ کے منصوبوں کو نمایاں مقامات پر آویزاں کرنا
- سال میں کم از کم دو بار آگ سے بچاؤ کی مشقیں منعقد کرنا
- اساتذہ اور عملے کے لیے آگ سے بچاؤ کی تربیت
- خصوصی ضروریات والے طلبا کے لیے خاص حفاظتی انتظامات
- اجتماعی نقطہ کا تعین
انتباہی کارروائی کا اعلان
محکمہ تعلیم نے واضح کیا ہے کہ ہدایات پر عمل نہ کرنے والے اسکولوں کے خلاف سخت کارروائی کی جائے گی۔
گل پلازہ سانحہ
یہ اقدامات 17 جنوری کی رات گل پلازہ میں لگنے والی بھیانک آگ کے بعد اٹھائے گئے ہیں، جس میں 1,200 سے زائد دکانوں پر مشتمل تاریخی شاپنگ مال مکمل طور پر خاکستر ہو گیا تھا۔ اب تک 70 سے زائد لاشوں کی بازیابی ہو چکی ہے جبکہ مزید افراد کی تلاش جاری ہے۔
ماہرین کا کہنا ہے کہ تعلیمی اداروں میں حفاظتی انتظامات کی یہ ہدایات وقت کی اہم ضرورت ہیں اور ان کے موثر نفاذ سے مستقبل میں ایسے المناک واقعات سے بچا جا سکتا ہے۔
