اسلام آباد: ترک صدر رجب طیب اردوان دو روزہ سرکاری دورے پر پاکستان پہنچ گئے ہیں۔ ان کے ہمراہ ترکی کی معروف کاروباری شخصیات بھی موجود ہیں۔ نور خان ایئر بیس پر صدر مملکت آصف علی زرداری اور وزیراعظم شہباز شریف نے ان کا پرتپاک استقبال کیا۔
ترک صدر کی آمد پر 21 توپوں کی سلامی دی گئی، جبکہ روایتی لباس میں ملبوس اسکول کے بچوں نے انہیں خوش آمدید کہا۔ اس موقع پر ملٹری بینڈ نے بھی روایتی انداز میں ترک صدر کا استقبال کیا۔ پاکستان کی فضائی حدود میں پاک فضائیہ کے جے ایف 17 طیاروں نے ترک صدر کے جہاز کو اپنی حصار میں لے کر اسلام آباد پہنچایا۔
صدر اردوان اپنے دورے کے دوران وزیراعظم شہباز شریف اور صدر آصف علی زرداری سے ملاقاتیں کریں گے۔ دونوں ممالک کے درمیان اعلیٰ سطح اسٹریٹجک کوآپریشن کونسل کے اجلاس کی مشترکہ صدارت بھی ہوگی۔ اس دورے کے دوران متعدد اہم معاہدوں اور ایم او یوز پر دستخط ہونے کی توقع ہے۔
