دمشق (اصل میڈیا ڈیسک) شام کی سرکاری خبر رساں ایجنسی (سانا) کی رپورٹ کے مطابق شامی حکومت کے فضائی دفاع نے دمشق کے قریب اسرائیلی جنگی طیاروں کی طرف سے داغے گئے میزائل کا جواب دیا ہے۔ شام کے سرکاری میڈیا کے مطابق منگل اور بدھ کی درمیانی شب اسرائیلی طیاروں نے دمشق اور دوسرے مقامات پر میزائلوں سے حملوں کئے تاہم شامی فضائیہ نےبھرپو جوابی کارروائی کی ہے۔
العربیہ کے نامہ نگار کے مطابق اسرائیلی فوج نے شام میں اسد رجیم اور ایران کی سمندر پار کارروائیوں میں ملوث تنظیم’القدس فورس’ کے ٹھکانوں پر بمباری کا سلسلہ جاری رکھا ہوا ہے۔
نامہ نگار کے مطابق اسرائیلی طیاروں نے شامی حکومت کی اہم تنصیبات اور قدس فورس کے ایک اسلحہ ڈپو کومیزائلوں سے تباہ کردیا ہے۔
شام میں انسانی حقوق کی صورت حال پرنظر رکھنے والے ادارے’سیرین آبزر ویٹری’ کے مطابق منگل کے روز اسرائیل نے دعویٰ کیا تھا کہ شام کے اندر سے اسرائیلی اہداف پر میزائل داغے گئے ہیں۔ شام سے میزائل داغے جانے کی اطلاع کے بعد اسرائیلی جنگی طیارں نے شام میں متعدد اہداف پر بمباری کی ہے۔
العربیہ کے نامہ نگار کے مطابق دمشق میں منگل کی رات زور دار دھماکوں کی آوازیں سنی گئی ہیں۔
ایک فوجی ذرائع کے حوالے سے بتایا گیا ہے کہ بدھ کی صبح 1:20 بجے ، اسرائیلی جنگی طیاروں نے دمشق کے آس پاس کے متعدد اہداف پر بمباری کی۔
ایک مقامی ذریعے کا کہنا ہے کہ اسرائیلی طیاروں کی بم باری پر ہمارے فضائی دفاعی نظام نے بھرپور جوابی کارروائی کی ہے۔ وہ میزائلوں کو روکنے اور ان کے اہداف تک پہنچنے سے پہلے ان میں سے بیشتر کو تباہ کرنے میں کامیاب ہوگئے۔ ذرائع کا کہنا ہے کہ اسرائیلی جارحیت کے نتیجے میں ہونے والے نقصانات کی تفصیلات جاننے کی کوشش کی جا رہی ہے۔
منگل کی صبح اسرائیلی فوج نے شام سے چار اسرائیلی علاقوں کی طرف راکٹ داغے جانے کی تصدیق کی تھی اور کہا تھا کہ ان حملوں میں کوئی نقصان نہیں ہوا ہے۔
