حیدرآباد (اصل میڈیا ڈیسک) امیر جماعت اسلامی سراج الحق نے کہا کہ آج پاکستان کو بغداد بنانے کی سازش ہو رہی ہے۔
علماء مشائخ رابطہ کونسل پاکستان سندھ کے تحت لطیف آباد کے مقامی ہال میں منعقد ہونے والی تحفظ ختم نبوتت، ناموس اہلبیت و عظمت صحابہ کانفرنس سے خطاب کرتے ہوئے سینیٹر سراج الحق کا کہنا ہے کہ 73سال سے پاکستان پر حکمرانی کرنے والوں نے کشمیر کو ضائع کردیا ہے اور اگر بھارت کا کشمیر پر قبضہ مستحکم ہوگیا تو پھر پانی خشک ہونے سے سندھ اور پنجاب بنجر بن جائیں گے،علمائے کرام اور مشائخ کو ملک میں اسلامی نظام کے نفاذ کیلیے اپنا کردار ادا کرنا پڑے گا۔
سینیٹر سراج الحق نے کہا کہ آج پاکستان کو بغداد بنانے کی سازش ہورہی ہے، تہتر سال سے حکمرانی کرنے والی اشرافیہ نے ملک کو دولخت کیا۔ اس ملک کو بچانے کیلیے علما اور مشائخ کو ہی اپنا کردار ادا کرنا پڑے گا، عدالتوں میں قرآن کا نظام نہیں ہے، تجارت میں سود کی ممانعت ہے اور ہماری ساری معیشت سود پر چل رہی ہے۔
سجادہ نشیں درگاہ عالیہ خواجہ غلام فرید کوٹ مٹھن شریف و رابطہ کونسل کے سرپرست اعلیٰ خواجہ معین الدین محبوب کوریجہ نے کانفرنس سے خطاب کرتے ہوئے کہا کہ مشائخ ایک بڑی قوت اور طاقت ہیں اگر علمااور مشائخ مل جائیں تو ملک میں اسلام کے نفاذ کو کوئی نہیں روک سکتا۔
جے یو پی نورانی کے صدر صاحبزادہ ابوالخیر محمد زبیر نے کہا کہ ہر طرف سے اسلام کے خلاف سازشیں ہور ہی ہیں،انھوں نے شرکا کو تجویز دی کہ وہ ایک علمائے کرام اور علماء مشائخ پر مشتمل ایک کمیٹی تشکیل دیکر مدارس کو بند کرنے کے معاملے پر وزیر اعلیٰ سندھ سے رابطہ کریں اور اگر سندھ حکومت نہیں مانتی تو پھر وزیر اعلی ہاؤس کے سامنے دھرنا دیا جائے۔
کانفرنس کے اختتام پر جماعت اسلامی پاکستان کے نائب امیر اسد اللہ بھٹو ایڈوکیٹ نے مشترکہ اعلامیہ پیش کیا۔
