کراچی سے تعلق رکھنے والے نوجوان کی محبت میں گرفتار امریکی خاتون اونیجا رابنسن کی اداکارہ ماہرہ خان سے امریکا میں ملاقات کی ویڈیو سوشل میڈیا پر وائرل ہوگئی۔ ملاقات کے دوران اونیجا نے پاکستانی خاتون انسپکٹر شبانہ کو یاد کیا، جن سے ان کی دوستی پاکستان میں ہوئی تھی۔ اس موقع پر ماہرہ خان نے بھی شبانہ کو ہیلو کہا۔
اونیجا رابنسن نے ملاقات میں کراچی کی مزیدار چکن بریانی کو بھی یاد کیا۔ واضح رہے کہ ماہرہ خان ان دنوں اپنی فلم “لو گرو” کی پروموشن کے سلسلے میں امریکا میں موجود ہیں۔
اونیجا رابنسن، جو نیویارک کی رہائشی ہیں، کراچی کے 19 سالہ ندال میمن کی محبت میں گرفتار ہو کر 11 اکتوبر کو پاکستان آئی تھیں۔ ندال میمن تو ان سے شادی کے لیے تیار تھا مگر اس کے گھر والوں نے شادی سے انکار کر دیا۔ اونیجا کا ویزا ختم ہونے کے بعد انہیں 10 نومبر تک کراچی سے جانا تھا، مگر وہ واپس نہیں گئیں اور کراچی میں کئی مشکلات کا سامنا کیا۔
خاتون کا ویزا اور ریٹرن ٹکٹ ختم ہونے پر انہوں نے کراچی ائیرپورٹ میں داخل ہونے کی کوشش کی، جس پر انہیں سکیورٹی نے روک لیا اور اے ایس ایف نے پولیس کے حوالے کر دیا۔ بعد ازاں گورنر سندھ کی مداخلت پر ان کے لیے 15 دن کا ایگزٹ پرمٹ جاری کیا گیا اور ایک فلاحی ادارے نے ان کے امریکا واپسی کے ٹکٹ کا بندوبست کیا۔
امریکا واپسی کے دوران اونیجا نے ائیرپورٹ پر اچانک انکار کر دیا، جس پر ائیر لائن نے انہیں آف لوڈ کر دیا۔ بعد میں خاتون کئی دن کراچی میں گزارتی رہیں اور ایک فلاحی ادارے نے انہیں پناہ دی۔ طبیعت خراب ہونے پر انہیں جناح اسپتال لے جایا گیا، جہاں ان میں بائی پولر ڈس آرڈر کی تشخیص ہوئی۔
کئی دن کے علاج کے بعد انہیں میڈیکل بورڈ نے سفر کے لیے فٹ قرار دیا اور وہ فروری میں 120 دن پاکستان میں گزارنے کے بعد امریکا واپس لوٹ گئیں۔ اونیجا رابنسن کی کہانی نے سوشل میڈیا پر بھی کافی توجہ حاصل کی۔
