سوڈان (اصل میڈیا ڈیسک) اسرائیل کے ساتھ افریقی ملک سوڈان نے دو طرفہ تعلقات استوار کرنے کی ڈیل طے کر لی ہے۔ اس تناظر میں اعلیٰ ترین فوجی جنرل کا کہنا ہے کہ وہ امریکی بلیک میلنگ کا شکار نہیں ہوئے۔
سوڈانی فوج کے اعلیٰ ترین جنرل عبد الفتاح عبد الرحمٰن البرہان نے پیر چھبیس اکتوبر کو اپنے ایک بیان میں واضح کیا کہ اسرائیل کے ساتھ تعلقات کو معمول پر لانے کے حوالے سے خرطوم حکومت کو امریکی بلیک میلنگ کا سامنا قطعاً نہیں رہا۔ سوڈانی حکومت کو اسرائیل کے ساتھ تعلقات بحال کرنے پر بعض عرب اور فلسطینی ناقدین کا سامنا ہے۔ ان ناقدین کا کہنا ہے کہ سوڈان نے اسرائیل کے ساتھ تعلقات بحال کر کے ‘پین عرب مفادات‘ اور فلسطینیوں کی جد و جہد کو نقصان پہنچایا ہے۔
اُدھر واشنگٹن سے بھی ٹرمپ انتظامیہ نے سوڈانی اور اسرائیلی تعلقات کی بحالی کا اعلان کیا تھا۔ اسی اعلان میں بتایا گیا کہ امریکی حکومت نے سوڈان کو دہشت گردی کی پشت پناہی کرنے والی اقوام میں سے خارج کر دیا ہے۔ سابق مطلق العنان حکمران عمر البشیر کی حکومت کے سن 2019 میں خاتمے کے بعد سے نئی حکومت امریکا سے مطالبہ کر رہی تھی کہ اسے اس ‘بلیک لسٹ‘ سے خارج کیا جائے۔
سوڈانی فوج کے اعلیٰ ترین جنرل عبد الفتاح عبد الرحمٰن البرہان نے ریاستی ٹیلی وژن کو انٹرویو دیتے ہوئے کہا کہ اسرائیل کے ساتھ تعلقات کو نارمل کرنے میں کسی قسم کی بلیک میلنگ شامل نہیں ہے۔ اس کا انہوں نے اعتراف کیا کہ تعلقات کی بحالی میں امریکی کرادر یقینی طور پر ‘عمل انگیز‘ کا تھا۔ اس تناظر میں یہ بھی اہم ہے کہ پچیس اکتوبر بروز اتوار سوڈانی وزارتِ خارجہ نے کہا تھا کہ رواں برس اگست میں امریکی وزیر خارجہ مائیک پومپیو نے خرطوم کے دورے پر ایسا عندیہ دیا تھا کہ دہشت گردی کی لسٹ سے اخراج کے لیے اسرائیل کے ساتھ تعلقات کو معمول پر لانا ہو گا۔
جنرل عبد الفتاح عبد الرحمٰن البرہان نے اپنے انٹرویو میں یہ بھی کہا کہ اسرائیل کے ساتھ تعلقات کو معمول پر لانا سوڈان کے مفاد میں ہے۔ جنرل کے مطابق وہ فلسطینی ریاست کے حق میں ہیں اور اس کی سرحد میں سن 1967 کے مقبوضہ علاقے بھی دیکھنا چاہتے ہیں۔ انٹرویو میں ان کا کہنا تھا کہ فلسطینی صورت حال کا مکمل بوجھ کسی بھی صورت میں اکیلے سوڈان پر ڈالنا درست نہیں ہے۔ انہوں نے اسرائیل کے ساتھ تعلقات بحال کرنے کے حوالے سے اُن افواہوں کی تردید کی کہ انہیں متحدہ عرب امارات کے دباؤ کا سامنا تھا۔
سوڈانی جنرل نے یہ بھی کہا کہ ملک تنہائی کا شکار ہونے کے ساتھ ساتھ سخت پابندیوں کا بھی سامنا کر رہا تھا جو ملک اور عوام کے لیے شدید مشکلات کا باعث تھا۔ ان کے خیال میں دہشت گردی کی لسٹ سے خارج ہونے کے بعد ان کا ملک پھر سے بین الاقوامی کمیونٹی کا حصہ بن گیا ہے۔ جنرل البرہان کا یہ بھی کہنا تھا کہ اب ان کے ملک کو اقتصادی فوائد ملنے کے علاوہ جدید ٹیکنالوجی تک رسائی بھی حاصل ہو سکے گی۔
اس دوران اسرائیل نے پانچ ملین ڈالر کی گندم سوڈان کو فراہم کرنے کا اعلان بھی کیا ہے۔ یہ اعلان سوڈان کو اجناس کی کمیابی کے تناظر میں ہے۔ یہ بھی معلوم ہوا ہے کہ سوڈان اور اسرائیل اگلے دنوں میں مختلف امور میں تعاون پیدا کرنے کی بات چیت شروع کرنے والے ہیں۔ ان میں زراعت، تجارت، اقتصادیات، شہری ہوابازی، مہاجرت سمیت کئی معاملات شامل ہیں۔
یہ امر اہم ہے کہ امریکی بلیک لسٹ سے خارج ہونے کے بعد سوڈان کے لیے بین الاقوامی امداد کے دروازے بھی کھل جائیں گے۔ اس کے علاوہ تین اکتوبر کے داخلی امن برائے سوڈان کے معاہدے پر پوری طرح عمل درآمد ہو سکے گا۔ سوڈانی فوج کے اعلیٰ ترین جنرل نے یہ بھی کہا کہ داخلی امن ڈیل سے سوڈان میں سرگرم کئی باغی گروپوں کو امن و استحکام کے دھارے میں لانا ممکن ہو گا۔
