کراچی (اسپورٹس رپورٹر) ایڈمنسٹریٹر و ڈپٹی کمشنر ضلع کورنگی شہریار گل نے اعلان کیا ہے کہ اکتوبر کہ دوسرے ہفتے ضلع کورنگی میں اسپورٹس فیسٹیول کا انعقاد کیا جائیگا یہ اعلان انہوںنے پاکستان اسپورٹس ویلفیئر ایسوسی ایشن کے سیکریٹری جنرل اور کمشنر کراچی اسپورتس کمیٹی کے کوارڈینٹر غلام محمد خان سے اپنے دفتر میں ملاقات میں کیا ،شہریار گل نے ملاقات میں مزید کہاکہ ضلع کورنگی کی تعمیر و ترقی اور عوام کو بنیادی سہولیات کی فراہمی کے ساتھ ساتھ صحت مند تفریحی سرگرمیاں بھی فراہم کرینگے۔
انہوں نے کہاکہ ضلع کورنگی کھیلوں کا مرکز ہے اس ضلع نے ملک کے نامور کھلاڑی پیدا کئے جنہوںنے دنیا میں پاکستان کا پرچم سربلند کیا ہے جن میں سعید انور ،توصیف احمد،تسلیم عارف ،نسیم حمید اور دیگر شامل ہیں لہذا ہم ایسے اقدامات کرینگے کہ ضلع کورنگی میں اسپورٹس ٹیلنٹ مزید سامنے آسکیں ۔شہر یار گل نے کہا کہ ضلع کورنگی اسپورٹس فیسٹیول میں 20کھیلوں کے مقابلے منعقد کئے جائینگے ہر ماہ 3کھیلوں کے مقابلوں کا انعقسد کیا جائیگا ،پہلے مرحلے میں کرکٹ ٹورنامنٹ راشد لطیف اکیڈمی کورنگی ،فٹ بال ٹورنامنٹ کالونی اسپورٹس اسٹیڈیم ملیر ،اور شوٹنگ بال ٹورنا منٹ غازی اسپورٹس شوٹنگ بال کورٹ شاہ فیصل کالونی پر منعقد ہونگے انہوںنے کہاکہ فیسٹیول کا آغاز راشد لطیف اکیڈمی پر کرکٹ فیسٹیول میچ سے ہوگا جو کہ کمشنر کراچی الیون اور چیف سیکریٹری الیون کے درمیان کھیلا جائیگا اور اس میچ میں سول اور فوجی افسران حصہ لیں گے ،شہریار گل نے کہا کہ ضلع کورنگی میں کھیلوں کے فروغ میں کردار ادا کرنیوالے اسپورٹس آرگنائزرز کو ایوارڈ کی تقریب کا انعقاد بھی کیا جائیگا جس میں ڈسٹرکٹ کورنگی کے 30بہترین اسپورٹس آرگنائزرز کو ایوارڈ دیا جائیگا۔
انہوں نے ضلع کورنگی اسپورٹس فیسٹیول کا کوارڈینٹر غلام محمد خان کو نامزد کیا ہے جبکہ ضلع کورنگی کے تمام اسسٹنٹ کمشنر ز صاحبان کو اُن کے سب ڈویژن میں منعقد ہونے والے ٹورنامنٹس کا نگراں مقرر کیا گیا ہے ۔فیسٹیول کی پہلی میٹنگ 25ستمبر2020ء کو منعقد ہوگی دریں اثناء غلام محمد خان نے ضلع کورنگی اسپورٹس فیسٹیول میں حصہ لینے کی خواہش مند اسپورٹس ایسوسی ایشنز کو ہدایت کی ہے کہ وہ اپنے کھیلوں کے انعقاد کے لئے مقامات اور اخراجات کی تفصیل محکمہ اطلاعات آفس بلدیہ کورنگی ملیر ماڈل زون آفس میں محمد ارشد کے پاس 24ستمبرایک بجے دن تک جمع کرا دیں۔
جاری کردہ : سیکریٹری اطلاعات
پاکستان اسپورٹس ویلفیئر ایسوسی ایشن
