لاہور (اصل میڈیا ڈیسک) اداکارہ و میزبان وینا ملک کو ان کے سابق شوہر اسد خٹک نے 50 کروڑ روپے ہرجانے کا نوٹس بھیج دیا۔
وینا ملک کے سابق شوہر اسد خٹک نے ان پر دونوں بچوں کو غیر قانونی طریقے سے دبئی سے پاکستان منتقل کرنے کے الزام عائد کیا ہے۔
اسد خٹک نے گزشتہ دنوں ٹوئٹر پر متعدد ٹوئٹس کیے جس میں انہوں نے وینا ملک پر الزامات لگائے۔
اسد خٹک نے کہا کہ بہت سوچا لیکن اب صبر کا پیمانہ لبریز ہوچکا، میری خاموشی کو بزدلی سمجھا گیا، مجھے امید ہے کہ ایک باپ کو انصاف ملے گا کیونکہ اللہ کے ہاں دیر ہے اندھیر نہیں۔
انہوں نے کہا کہ جس اذیت سے میں گزر رہا ہوں کسی کو جواب دینا ہوگا، میں نے وینا ملک کو 50 کروڑ ہرجانے کا نوٹس بھیج دیا ہے۔
وینا ملک کے سابق شوہر نے کہا کہ وینا نے ڈیڑھ سال سے زائد عرصہ گزرنے کے باجود نہ مجھے اپنے بچوں سے ملنے دیا ہے اور نہ بات کرنے دے رہی ہے۔
ان کا کہنا تھا کہ تنگ آکر مجھے قانونی راستہ اپنانا بڑا اور دبئی کورٹ نے بھی میرے حق میں فیصلہ کیا لیکن وینا فرار ہوئی اور بچے متحدہ عرب امارات سے پاکستان اسمگل کر دیے گئے۔
اسد خٹک نے مزید کہا کہ میرے دونوں بچے امریکن شہری ہیں، وینا ملک نے نہ صرف مجھے دھوکا دیا بلکہ دبئی حکومت کو بھی چکمہ دے کر بچوں کو پاکستان لے آئی، اب ان سب باتوں کا جواب کورٹ میں دینا ہوگا، دو امریکی شہری کس طرح دبئی سے پاکستان اسمگل ہو گئے، پاکستانی حکومت کہاں ہے؟۔
وینا ملک کے سابق شوہر کا مزید کہنا تھا کہ ان سب کے باوجود میری ہی کردار کشی کی گئی، مجھے اور میرے خاندان کو دھمکیاں اور ہراساں کیا گیا، میرا کیرئیر تباہ اور میرے ساتھ بازاری زبان استعمال کی لیکن انسان کا سب بڑا اثاثہ اس کی اولاد ہوتی ہے، جن آنکھوں سے نور چھن جائے ان کے صبح شام ایک برابر ہوتے ہیں۔
اسد خٹک نے کہا کہ بہت بڑے نامور لوگوں اور علما کے کہنے پر زبان بند رکھی، بچوں کی خاطر ہر چیز برداشت کی لیکن وقت آ گیا ہے کہ اس شرمناک عورت کی اصلیت سب کے سامنے رکھی جائے۔
انہوں نے کہا کہ میں آج سوشل میڈیا کے توسط سے ہر اتھارٹی سے درخواست کرتا ہوں، مجھے انصاف دلوائیں، مجھے میرے بچے لوٹا دیں۔
وینا ملک کے سابق شوہر نے اپنے ٹوئٹر اکاؤنٹ پر دستاویزات شیئر کرنے کے ساتھ ساتھ کہا کہ میں ہر قسم کی سخت قانونی چارہ جوئی کا حق رکھتا ہوں، میرے بچوں کو بازیاب کرایا جائے۔
بعدازاں وینا ملک نے سابق شوہر اسد خٹک کی جانب سے تمام تر الزامات کے بعد ایک دستاویز شیئر کی اور بتایا کہ قانون اور شریعت کی رو سے 25.09.2019 سے بچوں کی سرپرستی میرے پاس ہے۔
وینا ملک نے ایک اور دستاویز شیئر کی اور بتایا کہ دبئی میں بھی قانون اور شریعت کی رو سے سرپرستی میرے پاس ہے۔
خیال رہے کہ وینا ملک نے 2013 میں اسد خٹک سے شادی کی تھی اور ان کے دو بچے ہیں جب کہ انہوں نے 2017 میں اسد خٹک سے خلع لے لی تھی۔
