امریکہ (اصل میڈیا ڈیسک) امریکی صدر نے پہلی عالمی جنگ کے دوران فرانس میں ہلاک ہونے والے ملکی فوجیوں کے لیے ’شکست زدہ‘ کے الفاظ استعمال کیے تھے۔ صدر ٹرمپ کے ان الفاظ کے بارے رپورٹ ایک جریدے میں شائع ہوئی ہے۔
معتبر ‘اٹلانٹک‘ جریدے میں شائع ہونے والی رپورٹ میں بیان کیا گیا ہے کہ امریکی صدر نے پہلی عالمی جنگ کے دوران ہلاک ہونے والے امریکی فوجیوں کے قبرستان جانے سے بھی انکار کر دیا تھا۔ یہ رپورٹ جریدے اٹلانٹک کے ایڈیٹر ان چیف جیفری گولڈ برگ نے تحریر کی ہے۔ ان کے مطابق یہ واقعہ سن 2018 کا ہے جب، ڈونلڈ ٹرمپ یورپ کے دورے کے دوران فرانس پہنچے ہوئے تھے۔
گزشتہ صدی کی دوسری دہائی میں لڑی جانے والی پہلی عالمی جنگ میں مرنے والے امریکی فوجیوں کی قبریں فرانسیسی دارالحکومت پیرس کے نواح میں واقع ‘این مارنے‘ (Aisne Marne) قبرستان میں ہیں۔ اسی مقام پر یعنی این مارنے جنگ پندرہ جولائی سے چھ اگست سن 1918 تک لڑی گئی تھی۔ اس جنگ میں اتحادی فوج کے ہلاک اور زخمی ہونے والے پچانوے ہزار فوجیوں میں سولہ ہزار امریکی فوجی بھی شامل تھے۔
اٹلانٹک جریدے کے چیف ایڈیٹر کے مطابق صدر ٹرمپ نے ان فوجیوں کی قبروں کے مقام تک جانے سے یہ کہہ کر گریز کیا کہ این مارنے قبرستان شکست کھانے والے امریکی فوجیوں سے بھرا ہوا ہے۔ یہ بات انہوں نے اپنے وفد کے سینیئر اہلکاروں کے ساتھ ہیلی کاپٹر پرواز سے کچھ وقت قبل کہی تھی۔ بعد میں یہ توجیح پیش کی گئی کہ موسم کی شدید خرابی کی وجہ سے امریکی صدر کا خصوصی ہیلی کاپٹر اُڑان نہیں بھر سکا تھا۔ اس تناظر میں جیفری گولڈ برگ کا کہنا تھا کہ ٹرمپ کو یہ پریشانی لاحق تھی کہ بارش اور خراب موسم میں ان کا ہیئر اسٹائل بکھر کر رہ جائے گا۔ گولڈ برگ نے اس مناسبت سے اپنی شائع شدہ رپورٹ میں چار افراد کا چشم دید گواہ کے طور پر حوالہ ضرور دیا لیکن ان کا نام نہیں ظاہر کیا۔
ڈونلڈ ٹرمپ نے اس رپورٹ کی مذمت کرتے ہوئے اسے غیر معمولی طور پر حیران کن اور معمول سے بڑھا چڑھا کر قرار دیا۔ ان کے مشیران نے بھی اس رپورٹ کو من گھڑت، مضحکہ خیز اور جھوٹ کا پلندا خیال کیا ہے۔
دوسری جانب ناقدین کا کہنا ہے کہ ایسا ممکن ہو سکتا ہے کیونکہ ٹرمپ مرحوم سینیٹر جان مککین کے ویتنام کی جنگ میں گرفتار ہونے کے بارے میں بھی ناشائستہ کلمات ادا کر چکے ہیں۔ ٹرمپ نے مککین کو جنگی ہیرو ماننے سے انکار کرتے ہوئے کہا تھا کہ وہ اس لیے ہیرو بنے کیونکہ وہ گرفتار ہو گئے تھے۔ ٹرمپ نے ایک ٹویٹ میں بھی واضح کیا تھا کہ وہ جان مککین کے کبھی بھی مداح نہیں رہے تھے۔
ٹرمپ کا مزید کہنا ہے کہ یہ تمام باتیں اس لیے کی جا رہی ہیں کیونکہ سن 2020 کے انتخابات قریب ہیں۔ ایسا کرنے والے حاسد اور جھوٹے ہیں اور وہ انتخابی عمل کو متاثر کرنے کی کوشش میں ہیں۔ ان کا یہ بھی کہنا کہ یہ سب کچھ جعلی نیوز ایجنسیوں کا کیا دھرا ہے۔ ٹرمپ نے یہ بھی کہا کہ وہ حلفیہ کہتے ہیں کہ انہوں نے اپنے فوجیوں کی کبھی تحقیر نہیں کی اور ہمیشہ انہیں ہیرو قرار دیا ہے۔
