اسلام آباد (اصل میڈیا ڈیسک) وزیراعظم عمران خان نے کہا ہے کہ کسی سے بلیک میل نہیں ہوں گے اور احتساب کا عمل جاری رہے گا۔
وزیراعظم عمران خان کی سربراہی میں تحریک انصاف کی کور کمیٹی کا اجلاس ہوا جس میں معاشی صورتحال، آزاد کشمیر انتخابات، بجٹ اور احتساب کے معاملے پر گفتگو کی گئی۔
ذرائع نے بتایاکہ اجلاس میں وزیراعظم کو ترین گروپ سے ہونے والی ملاقات پر وزیراعلیٰ پنجاب نے آگاہ کیا۔
ذرائع کے مطابق کورکمیٹی اجلاس میں اتفاق کیا گیا کہ جائز مطالبات تسلیم ہوں گے۔
اس موقع پر وزیراعظم نے کور کمیٹی سے خطاب میں کہاکہ پی ٹی آئی میں موٹر سائیکل پر آنے والے لینڈ کروزر کا خیال دل سے نکال دیں، انصاف کے نام پر بننے والی پارٹی میں کسی کو این آر او دینے کا سوچ بھی نہیں سکتا۔
انہوں نے کہا کہ احتساب کا عمل جاری رہے گا، حکومت جاتی ہے تو جائے، کوئی غلط فہمی میں نہ رہے، کسی کے دباؤ میں نہیں آئیں گے اورقانون کی حکمرانی کو یقینی بنائیں گے۔
ان کا کہنا تھاکہ اپوزیشن سمیت سب لوگ گواہ ہیں، وہ کسی پر کوئی نئے کیس نہ بناسکتے ہیں نہ ہی ختم کرسکتے ہیں۔
وزیر اعظم عمران خان نے ملکی معاشی صورتحال پر اطمینان کا اظہار کیا اور کہاکہ کورونا کے باوجود ملکی معیشت درست سمت میں گامزن ہے، آئندہ بجٹ میں عام آدمی کو ریلیف ملے گا۔
ذرائع کا کہنا ہے کہ اجلاس میں آزادکشمیرکے انتخابات کی تیاریوں پر بھی گفتگو کی گئی جبکہ وزیراعظم نے آزادکشمیر انتخابات کیلئے تیاریاں تیز کرنے کی ہدایت کی۔
ذرائع کا کہنا ہے کہ وزیراعظم نے گفتگو میں کہا کہ تحریک انصاف آزادکشمیر کے انتخابات میں واضح کامیابی حاصل کرے گی۔
